Түркістанда жөндеуден өткен көпқабатты үйдің қабырғалары қайта жарылып жатыр

Бұл 5 қабатты 60 пәтерлік тұрғын үйдің бой көтергеніне небәрі алты жыл болса да, қабырғаларына сызат түсіп, жарықшақтар күннен-күнге үлкейіп келеді. Осының әсерінен туыстарының үйін паналап кеткен тұрғындар да бар.

Фото: Сәбит Тастанбек

Сапасыз салынған көпқабатты үйге алты жылдың ішінде бірнеше рет жөндеу жұмыстары жүргізілген.

Фото: Сәбит Тастанбек

Түркістан қаласы құрылыс бөлімінің мәліметінше, 2021 жылы тұрғын үй техникалық тексеруден өтіп, апаттық емес деген қорытынды алынған. Тұрғын үйдің жертөлесінде су кету салдарынан тұрғын үйге ортаңғы бөлігінің артқы жағынан екі жерден тіреу, яғни темір торламамен бетон құйылып, ретке келтірілген. Ал 2023 жылы тұрғындар тарапынан кіреберіс және үйдің сыртқы қабатында жырықтар көбеюіне байланысты қайта ағымдағы жөндеу жұмыстары жүргізілген.

Фото: Сәбит Тастанбек Фото: Сәбит Тастанбек

— 2025 жылы тұрғын үйдің 5 жылдық кепілдік мерзімі өтіп кетуіне байланысты демеушілер есебінен аталған тұрғын үй қайта техникалық тексеруден өткізілді. Нәтижесінде тиісті зерттеу орталықтарының ұйғарымымен бұл үй апаттық емес деп танылды. Техникалық тексеру барысында сарапшының ұсынысы бойынша қосымша тұрғын үйдің іргетасына жан-жақты 33 бетон тіреуіш құйылып, 16 пәтерге күрделі жөндеу жұмыстары жүргізілді. Сонымен қатар, 1,2 кіреберістегі қабырғадағы сызаттар қайта жөнделді. Қазіргі таңда әкімдік тұрғындардың пәтерлерін жөндеп беріп жатыр, — делінген әкімдіктің ресми хабарламасында.

Десе де, таяудағы жөндеу жұмыстарынан соң пәтерлер қайта бүліне бастаған. Тұрғындар сапасыз үйдің қабырғасы құлап кете ме деп жандарын шүберекке түйіп отырғанын айтады.

Фото: Сәбит Тастанбек

Аталған үйдің тұрғыны, жалғызбасты ана Злиха Искакованың айтуынша, жыл сайын жылыту маусымында үйдің құбырлары жарылып кетеді. Қазіргі таңда су жүрген құбырлардың айналасы көгеріп, сыз тартып тұр.

Фото: Сәбит Тастанбек Фото: Сәбит Тастанбек

— Жарылған қабырғаларды жамай бергеннен не пайда? Уақыт өте келе тағы да сыр береді. Қыс түссе суық, құбырлар істен шығып, проблемамыз басталады. Жоғарыдан су кетеді. Сантехниктерді шақырсақ, дер кезінде келмейді, жұмыстан тыс уақытта келіп тұрмыз деп ақысын сұрайды. Сондықтан құбырлардың кей бөлігін өз қаражатымызға істеуге тура келді. Өзімнің үйіме 4 жыл бұрын ғана жөндеу жұмыстарын жүргізгенмін. Бірақ құрылысшылар жақында көршілерімнің үйіне жөндеу жұмыстарын жүргізген кезде менің асүйімде қабырғадағы кафелдер құлап, қайтадан жарылып жатыр. Жаман айтпай жақсы жоқ, егер жер сілкінсе, не болады, үйдің астында қаламыз ба деп қорқамыз, — дейді тұрғын.

Фото: Сәбит Тастанбек Фото: Сәбит Тастанбек Фото: Сәбит Тастанбек Фото: Сәбит Тастанбек Фото: Сәбит Тастанбек

Тұрғындардың айтуынша, апаттың салдарымен күрескенше, оның алдын алған жөн. Сондықтан басқа қауіпсіз жерге көшіруі тиіс деген талап-тілегін де жеткізді. Ал қала билігі болса үйдің апатты жағдайда емес екенін айтып, тұрғындарды алаңдамауға шақырып отыр. 

                                                                                                                                                                                                                                                          Сәбит ТАСТАНБЕК