Түркияда О. Сүлейменов мұрасына арналған көрме өтті

«Масштаб. Планета. Жер». Анкарада дәл осындай атаумен түркі әлемінің рухани кеңістігінде ерекше орын алатын тұлға, ақын, жазушы, түркітанушы Олжас Сүлейменовтың мұрасына арналған халықаралық көрме өтті.

Қаламгердің еңбек және өмір жолына арналған ғылыми-танымдық шара Түркияда алғаш рет ұйымдастырылып отыр. Ерекше экспозицияға ЮНЕСКО, Түрксой ұйымы және мәдениетті жақындастыру орталығы ұйытқы болған. Шараға түркі елдерінен келген ресми өкілдер, ғалымдар, сондай-ақ Қазақстаннан арнайы келген делегация қатысты. Олар жазушы туралы деректі фильмді тамашалап, ғылыми еңбектерімен танысты. Сондай-ақ жиында Сүлейменовтың сиясы кеппеген «Я знаю» кітабының тұсауы кесілді. Ал жарыққа шыққанына жарты ғасыр толған «Аз И Я» еңбегі қазір қытай тіліне аударылып жатыр.

Салтанат Әшімова, ЮНЕСКО қамқорлығындағы мәдениеттерді жақындастыру орталығы директорының орынбасары:

- «Я знаю» кітабы жинақ. 60-70 жылға жуық жинаған өзінің тіл танымдық, түркі тану саласындағы еңбектері, соның ішінде кейінгі жазып жүрген «асирис заңы», «закон асириса», «өсіріс заңы» дейді. Сол өсіріс, бұл - өсімдік Құдайы. Египетте Асирис болса қазақтың өсіріс деген сөзінен шыққан деп дәлелдеп жатыр. Кезінде «Аз И Я»-да түркі сөздерін тапса, енді Египеттің Асирис деген аты қазақтың «өсіріс» деген атауы деп жаңалық енгізді.