Атбасардағы музейде Сәкен Сейфуллиннің өмірі мен мұрасына арналған көрме ашылды

Экспозицияда ХХ ғасырдың күрделі кезеңдерінен аман қалған бірегей музей жәдігерлері ұсынылды. Олардың ішінде Сәкен Сейфуллиннің жеке заттары, тұрмыстық бұйымдары, сирек кітаптары, тарихи құжаттары, фотосуреттері және әдеби мұрасына қатысты материалдар бар. Бұл экспонаттар арқылы келушілер ақынның тұлғасын нақты деректер негізінде танып, оның өмір сүрген дәуірінің тарихи-әлеуметтік жағдайын тереңірек түсінді.

Көрме үш негізгі бөлімнен құралды: «Сәкен Сейфуллиннің өмір жолы», «Сәкен Сейфуллиннің қызметі» және «Сәкен Сейфуллиннің мұрасы». Іс-шара барысында келушілер ақынның отбасы, тұрмысы, қоғамдық қызметі мен әдеби мұрасына қатысты құнды материалдармен танысты. Сонымен қатар ХХ ғасыр басындағы қазақ қоғамының рухани бейнесі жан-жақты көрсетілді.

Көрмені ұйымдастырушылардың айтуынша, мұндай жобалар тарихты тек оқып қана қоймай, оны көзбен көріп, жүрекпен қабылдауға мүмкіндік береді. 

– Бұл экспозиция Сәкен Сейфуллиннің көпқырлы тұлғасын тереңірек танытуға бағытталған. Ұсынылған бірегей жәдігерлер арқылы біз тек бір адамның өмір жолын ғана емес, тұтас бір дәуірдің тарихи-рухани бейнесін және халқымыздың тағдырлы кезеңдерін біле аламыз. Көрме мазмұны Сәкеннің балалық шағынан бастап, қоғамдық қызметі мен әдеби мұрасына дейінгі кезеңді қамтиды. Бұл бастама ұлттық тарих пен мәдени мұраға құрметті арттырып, өскелең ұрпақтың санасында рухани сабақтастықты нығайтуға ықпал етеді, - деді көрме кураторы Нұрсерік Жолбарыс.

Көрменің ашылуында сөз сөйлеген тарих ғылымдарының докторы, профессор, Дирекция директорының орынбасары Марат Абсеметов мұндай шаралардың маңыздылығын атап өтті.

– Бүгін – еліміз бен Атбасар қаласы үшін маңызды күн. 28 жасында Қазақ халық комиссарлар кеңесінің төрағасы болып, мемлекетіміздің іргетасын қалауда белсенді қызмет еткен Сәкен Сейфуллиннің көрмесі ұйымдастырылды. Небәрі 44 жыл өмір сүрген қайраткердің күреске толы ғұмыры – асыл қазына. Астанадағы Сәкен Сейфуллин музейінің көрмесі алғаш рет Атбасар қаласында өтті. Жеті мыңнан астам музей қорынан таңдалған ең құнды жәдігерлер, фотосуреттер мен тарихи құжаттар осы көрмеде ұсынылды. Көрме алдағы уақытта басқа қалаларда да жалғасады, - деді ол.

Көрме Атбасар қаласындағы Ілияс Есенберлиннің әдеби музейінде 30 сәуірге дейін өтеді. Одан кейін экспозиция Талдықорған және Орал қалаларында көрсетіледі.

Бұған дейін Самарқандтағы көрмеде Әмір Темірдің сыйға тартқан туы мен тарихи жәдігерлері қойылғанын жазғанбыз.