Үш күн ішінде 22 мыңнан астам заң бұзушылық ІІМ Қазақстанның танымал тасжолдарында бақылауды күшейтті

Қазақстанда "Қауіпсіз жол" жедел-профилактикалық іс-шарасы жалғасып жатыр. Рейдтің алғашқы үш күнінде полицейлер 22,5 мыңнан астам Жол жүрісі қағидаларын бұзу дерегін анықтады, деп хабарлайды Tengri Auto тілшісі Polisia.kz-ке сілтеме жасап.

ІІМ мәліметінше, 11-16 шілде аралығында бүкіл ел аумағында жолдағы жағдайды бақылау күшейтілді. Жолдарда патрульдік жасақтар саны көбейтіліп, негізгі күш көбіне ауыр апаттарға себеп болатын өрескел ЖЖҚ бұзушылықтарын анықтауға бағытталды.

Ведомство деректеріне сәйкес, операцияның үш күнінде полицейлер мынадай деректерді анықтады:

автокөлікті масаң күйде басқарудың 300-ден астам дерегі; қарсы қозғалыс жолағына шығудың 260 жағдайы; жолаушыларды, багажды және жүктерді тасымалдау қағидаларын бұзудың 850-ден астам дерегі; жолаушыларды заңсыз тасымалдаудың 139 дерегі, оның ішінде 60-тан астамы такси саласында.

Сонымен қатар мамандандырылған тұрақтарға 1,5 мыңнан астам көлік құралы қойылды.

ІІМ рейдтің басты мақсаты айыппұл санын көбейту емес, жол-көлік оқиғаларының алдын алу және жолдағы қауіпті мінез-құлыққа жол бермеу екенін атап өтті.

Қазіргі уақытта республикалық тасжолдарға ерекше көңіл бөлініп жатыр. Мәселен, Жетісу облысында полиция қызметкерлері танымал демалыс орындары Алакөл мен Балқаш көлдеріне баратын жолдарда күшейтілген режимде жұмыс істеп жатыр.

Полиция мәліметінше, жыл басынан бері өңірде 524 жол-көлік оқиғасы тіркелген. Жаз мезгілінде демалушылар мен туристер есебінен бұл бағыттағы көлік ағыны айтарлықтай артады.

Осыған байланысты полицейлер жүргізушілерге жылдамдық режимін сақтау, көлікті мас күйде басқармау және алыс жолға шаршаған күйде шықпау қажеттігін ескертеді.

Google News арқылы жаңалықтарымызды қадағалаңыз

Жазылу