Ұстаздың 95% ы өз жұмысына көңілі толатынын мәлімдеді

ҚР Оқу-ағарту министрлігінің кеңейтілген алқа отырысында халықаралық TALIS-2024 зерттеуінің қорытындылары жарияланды. 

Ұсынылған мәліметке сүйенсек, Қазақстан мұғалімдердің жалақыға қанағаттану деңгейі бойынша әлемдегі үздік бес елдің қатарына енді. 2018 жылы бұл көрсеткіш небәрі 39% болса, 2024 жылы 71%-ға жетті. Бүгінде еліміздегі педагогтердің 95%-ы өз жұмысына көңілі толатынын мәлімдеп, кәсіби қанағаттанудың жоғары деңгейін көрсетіп отыр.

Ведомство мамандарының айтуынша, «Мұғалім мәртебесі туралы» заңның қабылдануы саладағы түйткілді мәселелерді шешуге мүмкіндік берді. Мұғалімдердің апталық жүктемесі 50 сағаттан 36 сағатқа дейін қысқартылып, демалыс уақыты 56 күнге ұзартылды. 

Соңғы жылдары мектеп мұғалімдерінің жалақысы екі есе, балабақша тәрбиешілерінің еңбекақысы 30%-ға артты. Бұл шаралар педагогтердің әкімшілік жүктемесін азайтып, олардың негізгі міндеті - бала оқыту мен кәсіби дамуға көбірек уақыт бөлуіне жағдай жасады. 

Министрліктің мәліметі бойынша, магистр дәрежесі бар мамандардың үлесі үш есе өсіп, 11%-ды құрады.

Қазақстандық мұғалімдердің халықаралық конкурстарға қатысуы және бірқатар ұстазға мемлекеттік атақтардың берілуі үлкен жетістік ретінде бөлек атап өтілді.

Министрлік алдағы уақытта жас мамандарды қолдау, цифрлық сауаттылықты арттыру және кадрларды даярлаудың озық стандарттарын енгізуді жалғастырады. 

Бүгін, 12:22