Жамбыл облысында малшы 50 бас қойды жасырын сатып жіберген

АСТАНА, 19 мамыр – Sputnik. Жамбыл облысында ер адам өзіне сеніп тапсырылған бөтен мүлікті иемденгені және талан-таражға салғаны үшін сотталды, деп хабарлады облыстық соттың баспасөз қызметі.

Ер адамға қатысты қылмыстық іс апелляциялық тәртіппен қаралды.

Бірінші сатыдағы сот сотталушы малшы бола отырып, ақшаға мұқтаж болып, өзінің материалдық жағдайын жақсартуға шешім қабылдағанын анықтады.

"Жақын арада оған сақтауға сеніп тапсырылған қойларды қайта есептемейтінін ескере отырып, ол бір басына 110 мың теңге тұратын 50 бас қой мен 80 мың теңге тұратын 26 бас жас малды сатқан", - деп жазылған хабарламада.

Жәбірленушіге 7,5 млн теңгеден астам сомаға материалдық шығын келтірілген. Сотталушы барлық ақшаны иемденіп, жеке мақсатта пайдаланған.

Т.Рысқұлов аудандық сотының үкімімен оған 3 жыл бас бостандығын шектеу түріндегі жаза тағайындалды. Жәбірленушінің пайдасына барлық материалдық залал өндірілді. Алайда үкімге аудан прокуроры мен жәбірленуші шағымданып, бас бостандығынан айыру жазасын тағайындауды сұрады.

Апелляциялық алқа іс материалдарын зерттей келе, үкімнің жаза бөлігін өзгертті. Қылмыстық істер жөніндегі апелляциялық алқаның қаулысымен 3 жылға бас бостандығын шектеу түріндегі тағайындалған жаза 3 жылға бас бостандығынан айыруға ауыстырылды.

Сот актілері заңды күшіне енді.