Жамбыл облысында жүк көліктері жол апатына ұшырады: екі адам зардап шекті

АЛМАТЫ, 25 ақпан – Sputnik. Жамбыл облысында екі бірдей жүк көлігі жол апатына ұшырады, деп хабарлайды облыстық полиция департаменті.

Республикалық маңызы бар "Батыс Еуропа – Батыс Қытай" автожолында "Мерседес Бенц" және "Фольксваген" көліктері жол апатына түсті.

Оқиғаның бейнежазбасы әлеуметтік желіде тарады. Жүк көлігінің бірі көлік доңғалағын тиеп алған. Жол апаты салдарынан доңғалақтар жолға шашылып, өзге көліктерге жолдан өтуге қиындық тудырды. Ал екінші жүк көлігінде бірнеше жеңіл автокөлік болды.

"Мерседес Бенц" автокөлігінің жүргізушісі рөлге ие бола алмай, жолдың жүріс бөлігін бөгеп тастаған. Салдарынан "Фольксваген" автокөлігінің жүргізушісі көлденең тұрған автовоздың бүйір бөлігіне соғылған", - дейді полиция.

Қазіргі уақытта тергеу жүріп жатыр.

Жамбыл облысының полиция департаменті жүргізушілерді жол қозғалысы ережелерін қатаң сақтауға және қозғалыс кезінде, әсіресе республикалық маңызы бар автожолдарда аса зейінді болу қажеттігін ескертті.