Жаңа фильм көрерменге жол тартты

Алматыда Tiger Films продюсерлік компаниясының жаңа туындысының премьерасы өтті.

«Назад в 90-ые. Мен оралам» фильмі арқылы көрермен кеңес кезеңіне сапар шеге алады. Киноның алғашқы көрсетілімі HALYK IMAX Kinopark 16 кинотеатрында өтті.

Фильмнің сюжеті бойынша, физика пәнінің мұғалімі Арман телепортация жасауға арналған құрылғы ойлап табады. Яғни әп-сәтте сүйіктісі екеуі Парижге топ ете қалмақ. Арманы сол жерде сүйіктісіне сөз салу. Алайда бұл тасымалдау құбылысы олардың өмірін күтпеген оқиғалармен байланыстырып жібереді.

Асар Әбілқайыров, режиссёр:

- Біз әке тақырыбына байланысты зерттеу жүргіздік. Нәтижесінде фантастика элементтері мен аздап драмасы бар шытырман оқиғаға толы туынды пайда болды. Фильмде шытырман оқиғаға тән юмор да бар, сондықтан кең аудиторияға ұнайды деп ойлаймын. Бұл фильм кеңес дәуірінде өмір сүрмеген жастарға да, сол кезеңге қайта сапар шегуді қалайтын ересек буынға да қызықты болады.

Фильмде басты рөлдерді Қазақстанның танымал актерлары Еркебұлан Тоқтар, Жұлдыз Өмірғали, Қуаныш Құдайберген, Лаура Мырзахметова,

Қуантай Әбдімәди сомдайды. Шытырман оқиғалы комедия бүгіннен бастап еліміздің кинотеатрларында прокатқа шығады.

Жұлдыз Өмірғали, актриса:

- Сценарий өзімнің өмірімдегі оқиғама жақын болғандықтан, барынша өзімді ойнауға тырыстым. Ең ұнағаны да ең қиын сахна да бір болған. Әкесімен қоштасатын жері қиын жағдай болды. Әкесі өзім үшін де, кейіпкер үшін де қиын болды. Сондықтан мен үшін қиын сахналардың бірі болды деп айта аламын.

Tiger Films продюсерлік компаниясы 50-ден аса фильм түсірген. Жаңа жылға дейін компания көрермендерге тағы бір комедия – «Руың кім» фильмін ұсынуды жоспарлап отыр.

Авторлары: Гүлжан Көленқызы, Кенже Амраев