Жәнібек Әлімханұлы Кроуфордпен қашан кездеседі

32 жастағы қазақстандық былғары қолғап шебері Instagram парақшасында Кроуфордпен кездесу шынайы жоспарға айналып келе жатқанын мәлімдеді.

- Бокс жанкүйерлерін жаңа, әсерлі айқас күтіп тұрған сияқты – Жәнібек пен Кроуфорд! Бұл туралы бәрі айтып жатыр. Егер бәрі ойдағыдай болса, жекпе-жек келесі жылы өтуі мүмкін. Менің ойымша, мықтылар әрдайым мықтылармен қолғап түйістіруі керек, – деп жазды Жәнібек Әлімханұлы.

Еске сала кетсек, 38 жастағы Теренс Кроуфорд үш түрлі салмақ дәрежесінде абсолютті чемпион атанған тұңғыш боксшы. Ол соңғы кездесуінде 35 жастағы мексикалық Сауль Канело Альваресті жеңіп, екінші орта салмақта абсолютті чемпион атағын иеленді. Кроуфорд командасы бұған дейін басқа салмақтарда да жаңа жекпе-жектер өткізуге дайын екенін мәлімдеген, алайда айқас абсолютті чемпиондық белбеулер үшін өтуі керек.

Қазіргі таңда Жәнібектің қоржынында төрт чемпиондық белбеудің екеуі WBO және IBF титулдары бар. Ол бірнеше мәрте қалған екі белбеуді, яғни WBC және WBA тұжырымдарын біріктіріп, абсолютті чемпион атануға деген ниетін білдірген.

WBC чемпионы, 31 жастағы доминикандық Карлос Адамеспен келіссөздер нәтиже бермеген соң, Әлімханұлының командасы WBA нұсқасы бойынша әлем чемпионы, 42 жастағы кубалық Эрисланди Ларамен айқас өткізудің сәті түскенін хабарлады.

Қазақстандық спортшының өкілі Берік Сұлтан әлеуметтік желідегі парақшасында бұл келісім туралы былай деп жазды:

– Барлық қазақстандықтар күткен тарихи әрі керемет айқасқа келісімшартқа қол қойылды. Алдағы күндері промоутерлік компаниялар ресми хабарлама жасайды. Орта салмақта нағыз дүр сілкіндіретін шоу болғалы тұр, – деді ол.

Егер бұл ақпарат ресми түрде расталса, Жәнібек Әлімханұлы үшінші чемпиондық белбеуге таласуға мүмкіндік алады. Бұл жеңіс оны абсолютті чемпион мәртебесіне бір қадам жақындатып, Кроуфордпен жекпе-жек өткізуге негіз болады.

Бұған дейін Жәнібек Әлімханұлы үш белбеу сарапқа салынатын тарихи жекпе-жекке қол қойғанын жазғанбыз.