Жүргізушілерді балдық жүйемен жазалау ұсынылды

Алматы-Бішкек трассасында болған жол апатынан 7 адам қаза тапты. Жеңіл және жүк көлігінің соқтығысуынан бірінші теміртұлпардағы жолаушылардың бәрі оқиға орнында тіл тартпай кеткен. Қазір тергеу жүріп жатыр. Ал құзырлы орын өкілдері қара жолдағы қателікті азайту үшін ереже бұзғандарға баллдық жүйе енгізуді ұсынып отыр. Оған көнбесе жүргізуші емтиханды қайта тапсыруға жіберілуі мүмкін.

Жыл басынан бері елде 29 мыңнан астам жол апаты болған. Салдарынан 2 мыңдай адам қаза тапты. Қара жолдағы қанды оқиғаларға қарапайым ережелерді бұзу себеп болып отыр. "Егер қауіпсіздік белдігі тағылып, жүргізуші қырағылық танытса, солардың жартысы аман қалар еді", - дейді полиция өкілдері. 

Ғалым Сарғұлов, ІІМ Әкімшілік полиция комитеті төрағасының орынбасары:

-  Тек жылдамдықты асырудың салдарынан 406 адам көз жұмды, қарсы  жолаққа шыққан – 400, жолды рұқсат етілмеген жерден өткен  – 67 адам қаза тапты.

Жолда  ессіз жүйткитін жүргізушілерді жүгендеу   үшін баллдық жүйе енгізу ұсынылып отыр. Заңнан қаймықпайтындар айыппұлмен ғана құтылмай, емтиханды қайта тапсыруға мәжбүр болады. Бас прокуратурада өткен жиында мұндай жаза кімге қолданылатыны түсіндірілді.  

Цитата: жол қозғалысы қауіпсіздігіне қатысты үйлестіруші кеңестің отырысынан

 «Жол қозғалысы ережелеріне қатысты заңбұзушылықтарды баллдық есепке алуды цифрлық тіркеуге негізделген енгізу керек. Бұл жүйелі түрде тәртіп бұзатын жүргізушілерді уақытылы анықтауға және оларды көлік жүргізуден шеттетуге мүмкіндік береді. Баллдың шекті деңгейіне жеткен жүргізушілер емтихандарды қайта тапсыруға жіберіліп, бұл дайындық сапасы мен жолдағы тәртіпті арттырады».

Апатқа кінәлі жүргізушілердің 81%-ы бұған дейін де бірнеше мәрте ереже бұзған. Жол қазғалысына қатысты үйлестіруші кеңес отырысында осындай сандар айтылды.  Мәселен, Шығыс Қазақстан облысында жүргізуші бір жылда 32 рет заң бұзып, соның ішінде 13 рет жылдамдықты асырған. Сайып келгенде қаңтарда дәл осы жүргізуші қарсы жолаққа шығып, салдарынан өзі және екі жолаушысы қаза тапты. Сондықтан ұсынылып отырған баллдық жүйе жол апатын азайтуға оңтайлы шешімдердің бірі болуы мүмкін дейді адвокат Ринат Баймолда.

Ринат Баймолда, Алматы облысының адвокаттар алқасы мүшесі, адвокат:

- Жол заңбұзушылықтарына байланысты баллдық жүйені енгізу туралы дұрыс деп санаймыз. Пилоттық режимде енгізуді сұрауға болады. Егер оңтайлы болса, сол кезде баллдық жүйені енгізу әбден мүмкін деп ойлаймын. Заңда былай жазылған: көлік деген аса қатерлі материалдық бағана. Көлікті айдау, ол аса маңызды болу керек және ол адамның өмірімен парапар ғой.

Осы тұста заңның үстемдігін нығайтумен қатар жол қозғалысына қатысушылардың әлеуметтік жауапкершілігін ояту маңызды. Мамандар талапты күшейтумен қатар, қоғамда көлік жүргізу мәдениетін дамыту қажет деген түйінге келді.

Авторы: Ғазиза Мұхамеджанова