Абай облысының полициясы тұрғындарға ескерту жасады

АЛМАТЫ, 28 қараша – Sputnik. Абай облысында күн райы бұзылады. Полиция тұрғындарға ескерту жасады, деп хабарлайды Sputnik Қазақстан тілшісі.

29 қарашада түнде және таңертең Абай облысының батысында, солтүстігінде, орталығында аздаған қар жауып, бұрқасындатады, көктайғақ болады.

"Түнде және таңертең облыстың оңтүстігінде, орталығында тұман басады. Солтүстік-батыстан соғатын жел оңтүстік-шығысқа ауысады. Облыстың оңтүстігінде, орталығында секундына 15-20 метр жылдамдықпен боран соғады", - дейді облыстық полиция департаменті.

"Қазгидрометтің" мәліметінше 29 қараша мен 1 желтоқсан аралағында ауа райы нашарлайды.

"Қазақстанның басым бөлігінде қар аралас жауын-шашын болады. Республиканың солтүстігінде, шығысында, орталығында қарлы боран, көктайғақ болады", - дейді ведомство.

Республиканың батысында, оңтүстік-шығысында жауын-шашын болмайды. Қазақстанның солтүстігіндегі ауа температурасы түнде 0-8 аяз, күндіз 0-5 жылы болады.

Оңтүстік-шығыста сынап бағанасы біртіндеп 3-11 градусқа дейін төмендейді. Таулы аймақтарда 0-5 градус аяз болады. Елдің қалған аумағында айтарлықтай өзгеріс болмайды.