Әлемдік БАҚ тағы Қазақстан: Каспий, Германияға мұнай жіберу және педофилдерді кастрациялау

Қазақстан Президенті Қасым-Жомарт Тоқаев Каспий теңізі мен трансшекаралық өзендердің жағдайына ерекше назар аударуды қажет деп санайды. Ол бұл пікірін Душанбедегі «Орталық Азия – Ресей» екінші саммитінде айтты. Бұл хабарды Әзербайжанның Azertaq басылымы ұсынған.

Қазақстан Президенті аймақ елдері экологиялық қауіптерге тап болып отырғанын айтып, мәселені шешу үшін үкімет басшылары мен тиісті органдар деңгейінде жүйелі және үйлестірілген шаралар қабылдау керек екенін атап өтті.

- Осыған орай Экология мәселелері жөніндегі Ресей және Орталық Азия елдерінің министрлер кеңесін бекітуді ұсынамыз. Трансшекаралық өзендер мен Каспий теңізінің жағдайына баса назар аудару керек. Бұл күрделі мәселені шешуге Каспийдің су ресурстарын сақтау бойынша мемлекетаралық бағдарламасын іске асыру ықпал етеді. Су қауіпсіздігінің қазіргі жағдайы да алаңдатпай тұрмайды. Су ресурстары мен ауыл шаруашылығы жерлерінің жай-күйін бақылау, сондай-ақ төтенше жағдайларды болжау үшін жасанды жер серіктерін пайдалана отырып ғарыштық мониторинг бойынша бірлескен бағдарлама жасақтауды және іске асыруды ұсынамыз, – деді Президент.

Қазақстан мен Германия 2026 жылға арналған мұнай жеткізу туралы келісімді ұзартты. Бұл туралы Report агенттігі хабарлады.

Келісім «ҚазМұнайГаз» ұлттық компаниясының басқарма төрағасы Асхат Хасенов пен Rosneft Deutschland GmbH компаниясының бас директоры Йоханес Бремер арасындағы кездесу қорытындысы бойынша бекітілді.

- Келісімге сәйкес, Германияға жеткізілетін қазақстандық мұнай көлемі ай сайын 100 мың тоннадан 130 мың тоннаға дейін арттырылмақ, – деп хабарлады ҚМГ баспасөз қызметі.

2024 жылы жеткізілім KMG Kashagan B.V. ресурстары есебінен басталса, 2025 жылы оған Теңізшевройл компаниясының мұнайы қосылған.

Компания мәліметінше, 2025 жылдың тоғыз айында Германияның Шведт қаласындағы мұнай өңдеу зауытына шамамен 1,5 миллион тонна қазақстандық мұнай жеткізілген.

Қазақстан Президенті Қасым-Жомарт Тоқаев XII Түркі тілдес мемлекеттер ұйымы саммитінде «ТМҰ +» форматын құру идеясын қолдайтынын айтты. Бұл формат ынтымақтастықты әрі қарай кеңейтуге бағытталған. Бұл туралы түркиялық Anadolu агенттігі хабарлады.

Қазақстан Президенті түркі халықтарының ортақ тарихын атап, киберқауіпсіздік мәселесі үшін ТМҰ аясында Кеңес құруды ұсынды.

Экономика саласында Түркі инвестициялық қорын тиімді пайдалану және «Түркі әлемінің перспективалары – 2040» бағдарламасын іске асыру маңызды деп атап өтті.

Қазақстан Президенті көлік пен логистикаға назар аударып, теміржол мен Транскаспий маршрутын жаңғырту, цифрландыру және жасанды интеллект қолдануды ұсынды.

Энергетика мен су ресурстарын тиімді пайдалану, мәдени-гуманитарлық байланыстарды нығайту да негізгі бағыттар ретінде аталды. Саммитке Түркия, Әзербайжан, Қырғызстан, Өзбекстан, Венгрия, Түрікменстан, Солтүстік Кипр лидерлері және ТМҰ Бас хатшысы қатысты.

Санкт-Петербургте Қазақстан Премьер-министрінің бірінші орынбасары Роман Скляр мен «Газпром» АҚ басқарма төрағасы Алексей Миллер кездесті. Тараптар газ саласындағы ынтымақтастықты дамыту перспективаларын талқылады және қазақстандық газды Ресейде ұзақ мерзімді қайта өңдеу бойынша негізгі шарттар туралы келісімге қол қойды. Жаңалықты ресейлік ТАСС жазды

Құжатқа сәйкес, Қарашығанақ кен орнынан өндірілетін газ Ресейдегі Орынбор газ өңдеу зауытында қайта өңделмек. Зауыт жақын арада жаңғыртудан өтетіні айтылған.

- Ресейден Қазақстанға жаңа магистральдық газ құбырын салу жобасын іске асыру туралы меморандумға қол қойылды, – делінген хабарламада.

Айта кетейік, бұған дейін «Газпром» мен Қазақстан 2025–2026 жылдары ресейлік газды республикаға жеткізуді ұлғайту туралы келісімге келген болатын.

Қазақстан Денсаулық сақтау министрлігі «Міндетті медициналық шараларды қолдану ережесін бекіту туралы» бұйрыққа өзгерістер енгізді. Жаңалықты қырғызстандық СentralАsia хабарлады.

Құжатқа сәйкес, кәмелетке толмағандарға жыныстық сипаттағы қылмыс жасағандар бостандыққа шығуға 6 ай қалғанда химиялық кастрацияға жіберіледі.

- Мекеме әкімшілігі жазасын өтеу мерзімі аяқталуға он екі ай қалғанда сотқа материалдар жолдап, сот-психиатриялық сараптама тағайындауға тиіс. Сараптама олардың психикалық ауытқуларының бар-жоғын және сексуалды зорлыққа бейімділігін анықтайды, – делінген бұйрықта.

Аталған норма психикалық ауруы бар, бірақ есі дұрыс деп танылған тұлғаларға қолданылмайды.

Бұйрық ресми жарияланған күннен кейін он күннен соң күшіне енеді.

2018 жылдан бері Қазақстанда баланы зорлағандарға химиялық кастрация қолдану заң жүзінде мүмкін болды. Ол тек сот шешімімен және сот-психиатриялық сараптама қорытындысы бойынша жүзеге асырылады. Заңға өзгерістер балаларға қарсы зорлық санының күрт өсуіне байланысты енгізілді. Сондай-ақ, 2024 жылдың ақпанында депутаттар педофилдерді хирургиялық кастрациялауды ұсынған болатын.