Алматы демалыс күндерін қар мен аязбен қарсы алады, ал Астанада күн +8 ге дейін жылынады

Алматыда жылбысқы қар жауып, үсік жүретін болса, Астанада күн айтарлықтай жылынады. "Қазгидромет" синоптиктері Қазақстанның екі ірі қаласында 23-25 қазанға арналған ауа райы болжамын ұсынды, деп хабарлайды Tengrinews.kz.

Алматыда ауа райы қандай болады?

Жұма күні, 23 қазанда Алматыда жаңбыр мен жылбысқы қар жауады деп күтіледі. Түнде ауа температурасы 0…+2 градус, күндіз +8…+10 градус болады. Солтүстік-батыстан соғатын желдің жылдамдығы секундына 3–8 метр, екпіні 13 метрге дейін жетеді.

Сенбі күні, 24 қазанда жауын-шашын жалғасады - синоптиктер жаңбыр мен қар жауып, тұман түседі деп болжап отыр. Түнде -2…-4 градусқа дейін үсік жүреді, күндіз ауа температурасы +3…+5 градусқа дейін көтеріледі. Солтүстік-шығыстан соғатын желдің жылдамдығы секундына 3–8 метр, екпіні 13 метрге дейін жетеді.

Жексенбі күні, 25 қазанда жауын-шашын күтілмейді. Түнде температура -4…-6 градусқа дейін төмендесе, күндіз +3…+5 градус болады. Солтүстік-шығыстан соғатын желдің жылдамдығы секундына 3–8 метр.

Осылайша, салыстырмалы түрде жылы болатын жұмадан кейін Алматыда күн айтарлықтай суытады. Тіпті сенбі мен жексенбі күндері де ауа температурасы күндіз +5 градустан жоғары көтерілмейді.

Демалыс күндері қар жауып, түнде үсік жүретін Алматыға қарағанда, Астанада жексенбіге қарай күн айтарлықтай жылынады.

Жұма күні, 23 қазанда ауыспалы бұлтты болады. Түнде ауа температурасы -2…-4 градус, күндіз 0…+2 градус болады. Жел солтүстік-батыстан, солтүстіктен секундына 7–12 метр жылдамдықпен соғады.

Сенбі күні, 24 қазанда жауын-шашын болжанбайды. Түнде -5…-7 градусқа дейін суытады, күндіз температура +2…+4 градус болады. Оңтүстік-батыстан соғатын желдің жылдамдығы секундына 5–10 метр.

Жексенбі күні, 25 қазанда түнде -3…-5 градус болады, ал күндіз ауа +6…+8 градусқа дейін жылынады. Оңтүстік-батыстан соғатын желдің жылдамдығы секундына 2–7 метр.

Бұған дейін "Қазгидромет" суық антициклонның жақындап келе жатқанын ескерткен болатын. Ол Қазақстанға жаңбыр мен қар әкелген циклонның орнын басады. Күннің суытуы батыс өңірлерден басталып, кейін елдің қалған аумағына тарайды. Болжам туралы толығырақ осы жерден оқыңыз.

Бізді Google-дың негізгі дереккөздер тізіміне қосыңыз