AMANAT : Қызылордада аймақтық кеңестің көшпелі отырысы өтті

«AMANAT» партиясы Қызылорда облыстық филиалының ұйымдастыруымен Сыбайлас жемқорлыққа қарсы іс-қимыл жөніндегі аймақтық кеңестің көшпелі отырысы өтті, - деп хабарлайды Aikyn.kz.

Облысқа қарасты Шиелі ауданында өткен жиынға аймақтық филиалдың атқарушы хатшысы  Ләйлә Төрешова, партиялық бақылау инспекторы Алтынбек Жарылқасынов қатысты.  

Жиынның күн тәртібінде Мемлекет басшысы Жолдауынан туындайтын міндеттер, «AMANAT» партиясының 2023-2027 ж.ж. «Халықпен  бірге!» Сайлауалды бағдарламасы қаралды.  Сонымен қатар,  ҚР Сыбайлас жемқорлыққа қарсы саясатының 2022-2026 ж.ж. арналған тұжырымдамасын іске асыру бағытында Шиелі және Жаңақорған аудандары әкімдерінің сыбайлас жемқорлыққа қарсы іс-қимыл жөнінде атқарған  жұмыстары  қаралып, талқыланды.

Көшпелі отырыста кеңес төрағасы Мақсұт Нәлібаев Мемлекет басшысы биылғы Жолдауында «Заң және тәртіп» – мемлекетіміздің мызғымас тұғыры екендігіне тоқталды.

–Соған сәйкес қоғамда осы қағиданы түбегейлі орнықтыру үшін барлық құзырлы органдар арасында ортақ көзқарас пен ортақ ұстаным болуы тиістігін айтып, мемлекеттік органдардың осы бағыттағы жұмысын барынша қолдау қажет, – деді ол.   

Жиында алдымен Жаңақорған ауданы әкімінің орынбасары Бақтияр  Ахметов хабарлама жасады. Ол есепті кезеңде ауданда сыбайлас жемқорлық сипатындағы қылмыстық іс-әрекет орын алмағандығын тілге тиек етіп, осы бағытта атқаралып жатқан жұмыстарды жеткізді.

«Қазақстан Республикасының мемлекеттік қызмет, сыбайлас жемқорлыққа қарсы іс-қимыл саласындағы заңнамасы және Әдеп кодексінің талаптарын сақтау мәселелері бойынша бүгінгі таңда 24 жеке консультациялық көмектер берілді.  Аудан әкімдігі жанындағы сыбайлас жемқорлыққа қарсы іс-қимыл мәселелері жөніндегі комиссияның 3 отырысы өтіп, онда 6 мәселе қаралды. Сонымен қатар, жобалық басқаруды жүзеге асыру қағидаларына сай 2025 жылға арналған сыбайлас жемқорлық тәуекелдеріне ішкі талдау жұмыстарын жүргізу кестесі бекітіліп, қорытындысымен мекеменің қызметін қозғайтын нормативтік құқықтық актілерді зерделеу барысында 14 тәуекел анықталды. Нәтижелері әкімдіктің ресми сайтына және «Битрикс 24» ақпараттық жүйесіне орналастырылды», -дейді Бақтияр  Ахметов.

Оның айтуынша, тұрғындар арасында сыбайлас жемқорлыққа қарсы мәдениетті қалыптастыру бағытында да түрлі әлеуметтік жоба іске асырылып жатыр. 

«Бұл жобалар аясында жыл көлемінде барлығы 30 іс-шара өткізу жоспарланған, бүгінгі күнге дейін 21 іс-шара сапалы ұйымдастырылды. Әрбір шарада ашық пікір алмасуға және тікелей түсіндіру жұмыстарына басымдық берілді. Жыл басынан «Сыбайлас жемқорлыққа қарсы менеджмент және комплаенс» тақырыбында 11 мемлекеттік қызметкер біліктілігін арттырды. Осы атқарылған жұмыстардың нәтижесінде ауданда жүргізілген сауалнама қорытындысымен «Сіз аудандағы сыбайлас жемқорлық деңгейін қалай бағалайсыз?» - деген сауалға тұрғындардың 23 %-ы «Сыбайлас жемқорлық деңгейі төмен» - десе, 35 %-ы «Сыбайлас жемқорлық мүлде жоқ» екендігін көрсетті. Жалпы бұл бағыттағы жұмыстарға аса мән беріліп, нақты іс шаралар қабылданатын болады», - деді аудан әкімінің орынбасары..

Келесі кезекте Шиелі ауданы әкімдігі жанындағы сыбайлас жемқорлыққа қарсы іс-қимыл мәселелері жөніндегі комиссия отырысының жұмысы талқыланды. Бұл бағытта ауданда сыбайлас жемқорлыққа қарсы өзекті мәселелер тұрақты түрде қаралып келеді. Атап айтқанда, халықпен тиімді кері байланыс орнату мақсатында аудан бойынша барлық мекемелерде «Оpen space» форматы қолданысқа енгізілген. Аудандық «Өскен Өңір» газетіне тоқсан сайын жергілікті атқарушы органдардың және құқық қорғау органдарының «Сенім» телефон нөмірлері мен жеке және заңды тұлғаларды қабылдау кестелері жариялануда. Барлық мемлекеттік мекемелердің ғимараттарында жеке және заңды тұлғалардың арыз-шағымдарына арналған пошта жәшігі орнатылған. Осы сынды атқарылған жұмыстарды баяндаған аудан әкімі аппаратының басшысы Ғалымжан Каримов сыбайлас жемқорлық тәуекелдеріне жүргізілген ішкі талдау жұмыстарының қорытындысын айтты.

«Сыбайлас жемқорлық тәуекелдеріне ішкі талдау жүргізудің үлгілік қағидаларына сәйкес, аудан әкімінің тапсырмасымен барлық дербес бөлімдердің қызметтеріне сыбайлас жемқорлық құқық бұзушылықтар жасауға ықпал ететін себептер мен жағдайларды жою жөнінде жыл басынан аудан әкімі аппараты мен 9 дербес бөлімге ішкі талдау жұмыстары жүргізіліп, 16 тәуекелдер анықталып, тиісті жұмыстар жасалды»,  - деді ол.

Өз кезегінде сөз алған партияның облыстық филиалының атқарушы хатшысы Ләйлә Төрешова өткен жылы қос ауданда да білім салаларында орын алған жемқорлық фактілерін тілге тиек етіп, сыбайлас жемқорлық тәуекелдерін болдырмау үшін әрбір сала бойынша ішкі талдау жұмыстарын күшейту қажеттігін жеткізді.

«Өздеріңізге белгілі қос ауданда 10 мыңға жуық партия мүшесі бар. Алайда олардың басым бөлігі білім саласының өкілдері екенін ескерсек, бұл салада жемқорлық немесе сыбайластық фактілері болуы өте ұят. Сондықтан алдағы уақыттарда аталған сала бойынша теріс қылықтар болмауы қажет», - деді  Ләйлә Төрешова.

Көшпелі отырыста кеңес мүшелерімен күн тәртібіндегі мәселелер жан-жақты талқыланып, маңызды ұсыныстар ортаға салынды. Жиын қорытындысы бойынша барлық ұсыныстар хаттамаға енгізіліп, жергілікті атқарушы органдардың, республикалық Кеңестің, басқа да тиісті мекемелердің назарына ұсынылатын болды.