Президент жанындағы Жастар саясаты жөніндегі кеңестің кезекті отырысы өтті

Астанада Мемлекеттік кеңесші Ерлан Қариннің төрағалығымен Президент жанындағы Жастар саясаты жөніндегі кеңестің кезекті отырысы өтті. 

Жиында Нашақорлыққа және есірткі бизнесіне қарсы күрес жөніндегі 2026-2028 жылдарға арналған кешенді жоспардың жобасы талқыланды. Жастарды жұмыспен қамту және жұмысшы мамандықтардың мәртебесін арттыру мәселелері сөз болды. Мемлекеттік кеңесші кеңес мүшелері Кешенді жоспар жобасына терең талдау жүргізіп, әлемдік тәжірибе зерделенгенін атап өтті. Мұнымен қоса іс-шараларды іске  асыруда мемлекеттік органдардың жауапкершілік тепе-теңдігі сақталмағанына назар аударды. Нашақорлықпен күрес тек Ішкі істер министрлігінің ғана жұмысы емес. Бұл ортақ жұмыс, ортақ жауапкершілік деді Ерлан Қарин. Келелі кеңесте көтерілген тағы бір маңызды мәселе - жастарды жұмыспен қамту және жұмысшы мамандықтарының мәртебесін арттыру жағдайы. Қатысушылар аталған бағытқа қатысты өз ойлары мен тың тәсілдерді ұсынды. Жиын қорытындысы бойынша Ерлан Қарин мүдделі мемлекеттік органдарға Жастар саясаты жөніндегі кеңес мүшелерінің ұсыныстары мен ұсынымдарын мұқият зерделеп, пысықтауды тапсырды.