Астанада Qarzhy Sagshysy ойыны таныстырылды

Астанада оқушылардың қаржылық сауаттылығын арттыруға бағытталған «Qarzhy Sagshysy» интерактивті ойыны таныстырылды. Шынайы өмірге негізделген тапсырмалар арқылы қатысушылар алаяқтардың шырмауына түспеуді үйреніп, интернеттегі қауіпсіздік талаптарын меңгереді. 

Жобаны бірнеше мемлекеттік орган бірлесіп әзірлеген. 1 желтоқсаннан бастап ойын республика бойынша барлық мектептер мен колледждерде өткізіледі. Интерактивті ойын «Заң мен тәртіп» бағдарламасы аясында әзірленген. 

Елдар Сейітханов 11-сыныптың оқушысы. Мектеп бітірген соң оқуға түсіп, үлкен өмірге қадам басқалы тұрған бозбала үшін бұл жобаның пайдасы орасан. Ойынға құрылған тапсырмалар балаға түрлі ақпаратты түсінікті әрі жеңіл етіп жеткізеді. Оқушылар «дроппер, алаяқтық, ақша аударымдары» сынды терминдермен де танысады.

Елдар Сейітханов, №82 «Дарын» мамандандырылған лицейінің 11-сынып оқушысы:

- Бұл ойын жалпы оқушылар арасында қаржылық сауатталықты арттыру үшін арналған деп ойлаймын және шынымен пайдасы бар. Сұрақ-жауап ойындары барлығы қаржылық сауаттылыққа қатысты. Мысалы, инвестиция, банктағы проценттер немесе депозит деген оңай терминдерді білген адам бұл ойынды өте алады деп ойлаймын.

Ойындағы сұрақтар шын өмірден алынған. Виртуалды әлемде оқушы үйден шыққан соң білім ордасына жеткенше түрлі кедергілерге тап болады. Логикалық сұрақтарға жауап беріп, тапсырмаларды орындайды. Арасында «алаяқтардың қоңырауы» да қарастырылған. Осылайша қатысушы қаржылық сауаттылыққа қатысты негізгі ақпаратты меңгереді.

Қанат Баетов, Қаржылық мониторинг академиясының бас маманы:

- Балалар арасындағы алаяқтықтың көбейіп кетуіне байланысты, сол алаяқтық схемалардан басқа да лудоманияға қарсы, электрондық темекілер солардан сақ болу үшін интерактив түрінде ойынды жасап шығардық. Ойын барысында алаяқтық қоңырау шалулар, соларға диалог ретінде жауап береді және де өмірде кездесіп жататын түрлі қызуғышылық, балалардың тарапынан пайда болуы мүмкін. Соның зиян екенін, оның түптеп келгенде балаларға кері әсер ететінін түсіндіру. Осы - басты мақсатымыз болды.

Ойынды әзірлеуге жарты жылдай уақыт кеткен. Оны жасауға жасанды интеллект және Цифрлық даму министрлігі, Оқу-ағарту министрлігі және Қаржылық мониторинг агенттігінің мамандары атсалысқан. 

Салтанат Көшербаева, ҚР Қаржылық мониторинг агенттігінің басқарма басшысы:

- «Заң және тәртіп» нарративі аясында Қаржы мониторингі агенттігі Оқу-ағарту министрлігімен бірлесіп «Qarzhy Sagshysy» ойынын өткізді. Ол жастардың қаржылық сауаттылығын арттыру мақсатында жасалған. Ойынға Астана қаласының 10–11 сынып оқушылары қатысты. Бұл - біздің алғашқы қатысушыларымыз. Олар қаржыны басқаруға арналған тапсырмаларды орындап, шағын ойындардан өтті, қаржылық қауіпсіздік жөніндегі сұрақтарға жауап беріп, дұрыс шешім қабылдауды үйренді. Ойын болашақта колледж студенттеріне де ұсынылады.

1 желтоқсаннан бастап «Qarzhy Sagshysy» жобасы республикалық деңгейде жүзеге асыралы бастайды. Компьютерлік ойын елдегі барлық мектептер мен колледждерде ұйымдастырылады. Ал жеңімпаздар аудандық, облыстық және республикалық деңгейлерде марапатталады.

Авторлары: Ғазиза Мұхамеджанова, Марат Диханбаев