Астара шекарасында қақтығыстан қашқан адамдарды қабылдап жатыр

Әзербайжан мен Иран шекарасындағы Астара қаласында АҚШ, Израиль және Иран арасындағы қақтығыстан қашқан адамдарды қабылдау жалғасуда. Әскерилер келгендерді қарсы алып, ыстық шай мен тамақ ұсынып, құжаттарын тексеруге бағыттап отыр, деп хабарлайды Euronews.

Соңғы екі күнде шекарадан өткендердің басым бөлігі — Әзербайжан азаматтары. Сонымен қатар 50 шетелдік, оның ішінде Сауд Арабиясының 18 дипломаты, БАӘ-нің 6 азаматы, Қатардың 10 дипломатиялық қызметкері, Италия азаматы, 4 иордандық, Тәжікстаннан келген 5 адамдық отбасы, 3 бангладештік және 18 қытайлық азамат эвакуациялық дәлізді пайдаланды.

Бұл дәліз арқылы Польша, Үндістан, Пәкістан, Непал, Бразилия, Тунис және Франция азаматтары да шыға алады. Ол үшін арнайы «эвакуация коды» қажет, бірақ кейбір адамдар бұл талаптан хабарсыз болып шықты.

Куәгерлердің айтуынша, қозғалыс өте қарқынды. Түркия азаматы Эрол Эрман Астараға жету үшін екі күн кеткенін, ал қалыпты жағдайда жол небәрі алты сағатты алатынын айтты. «Адамдар үрейде, барлығы бас сауғалап жатыр», — дейді ол.

Әзербайжан Сыртқы істер министрлігі өз азаматтарына Иранға бармауды, ал сонда тұрып жатқан азаматтарға елден шығуды ұсынды. Баку билігі шекарада автобустар ұйымдастырып, жедел жәрдем қызметін күшейтті. Қазіргі уақытта зардап шеккендер жоқ. Әзербайжан билігі қажет болған жағдайда шетел азаматтарының эвакуациясына көмектесуге дайын екенін мәлімдеді.

Бүгін, 17:11