Атырау облысында ауылға тартылған су жарамсыз боп шықты

Атырау облысында ауызсу жеткізуге арналған жоба нәтижесіз болды. Екі жыл бұрын Былқылдақты ауылына 209 млн теңге бөлініп, 10 шақырым құбыр тартылған.

Бірақ жеткізілген су ащы әрі ішуге жарамсыз болғандықтан тұрғындар оны тұтынудан бас тартқан. Олардың айтуынша тартылған құбыр да, су тұщытатын нысан да қазір қараусыз жатыр.

Былқылдақтыға тартылған құбыр да, су тұщытатын нысан да салынғаннан бері қараусыз жатыр. Мына ғимараттағы қондырғылар келген суды тазартып, үйлерге жеткізуі керек еді. Бірақ ойдағыдай болмады. Судың ащылығы сондай, тіпті мал да ішпейді.

Қуандық Елемесұлы құбыр арқылы ауылға су келетінін естігенде көпшілікпен бірге қуанған еді. Бірақ үйге жеткен тірішілік нәрі пайдаға аспаған. Енді суды тұшытып берсе, кәдеге жаратар едік,- дейді ол. Әзірге үйдің жанынан қазылған құдықтың суын ішіп отыр.

Қуандық Елемесұлы, Былқылдақты ауылының тұрғыны:

- Су тұшып, әр үйге қосатын болса жақсы болатын еді. Су тұшып жатса үй шаруашылығына қолданамыз. Ал әзірге келіп тұрғанмен, пайдаланып отырған жоқпыз. Өзіміздің үйдің қасынан қазып қойған құдығымыздан пайдаланып отырмыз.

10 шақырым жерден құбыр тарту жобасы ақылға қонымсыз шешім болды, дейді тұрғындар. Себебі ауыл маңында жыл бойы ағып тұратын тұщы су бар.

Бұл – 60-қа тарта тұрғыны бар Былқылдақты ауылының іргесіндегі бұлақ. Жыл он екі ай үзілмей ағады. Ауыл тұрғындары суды пайдаланады. Бұдан бөлек, әр үй шамамен 7 метр тереңдікте құдық қазып алған. Оның да суы тұщы.

Мәселе тек Былқылдақты ауылымен шектелмейді. Соркөл мен Сарықұмақ елдімекендеріне тартылған құбырлар да қазір жарамсыз күйде. Жауаптылардың түсіндіруінше, бұл аумақтың су қоры 2008 жылы зерттелген. Бірақ сол кезде бұлақ суын пайдалану мәселесі қарастырылмапты. Енді тұщы суды далаға жібермей, кәдеге жарату керек, - дейді облыстық Мәслихат депутаты Қайырбек Баймұратов.

Қайырбек Баймұратов, облыстық Мәслихат депутаты:

- Осы суды алып Атырауға алып бара жатырмын. СЭС-қа апарып тапсырып, анықтаймыз. Судың көлемі тәулігіне 600 куб су дейді. Неге далаға бостан-босқа ағып жатқан суды дер кезінде зерттеп, осыны неге жасамаған? Былай қарағанда 10 шақырымнан су тартады. Сонда 209 млн халықтың ақшасы желге ұшып кетті деген сөз ғой.

Сағыз ауылдық округі әкімінің айтуынша, бұл — бұрын бекітілген жоба бойынша салынған жүйе. Енді қараусыз қалған су тұщытатын станция мен құбырды «Сағыз су» мекемесіне сенімгерлік басқаруға беріп, жұмысты келер жылдан бастап жалғастыру жоспарланған.

Асхат Арыстанов, Сағыз ауылдық округінің әкімі:

- Бұл бұрынғы жоба бойынша жасалған ғой. Бізге дейін жасалған жоба. Енді біздің мақсат осы жобаны жалғастырып, жұмысты жүргіземіз. Суды жүргізуіміз керек. Енді бәрі салынып тұр ғой. Әр үйге су тартылып тұр. Осы жұмысты жалғастырып, суды жүргіземіз қалай болғанда да. Ол бұзылмайды, алға қарай суды жүргіземіз.

Тірлігі төрт түлікке байланған Былқылдақты ауылында қазір 20-ға тарта үй бар. Елдімекенге көгілдір отын тартылған. Енді ауыз су мәселесі шешілсе, көшіп кеткендер қайта оралар еді, - дейді ауыл тұрғындары.

Автордары: Асланбек Шығыр, Амантай Матенов, Жандос Рахметуллин