Атырау облысында электр энергиясы мен жылуға тариф әзірге өзгермейді

Бұл туралы Мәжіліс депутаты Дүйсенбай Тұрғанов қатысқан жиында айтылды. Мәселе – Атырау жылу-электр орталығының негізгі отыны саналатын табиғи газ бағасына қатысты. 

Қазірге дейін орталық табиғи газды «Теңізшевройлдан» жеңілдетілген шартпен алып келген. Алайда 2026 жылдан бастап тікелей жеткізу тоқтап, газды ұлттық оператор – QazaqGaz арқылы сатып алу ұсынылып отыр. Алдын ала есеп бойынша, газ бағасы бірнеше есе өссе, жылу тарифі орта есеппен 74%, ал электр қуаты 41% қымбаттауы мүмкін. Осыған байланысты Парламент депутаттарының араласуымен Үкімет жанынан арнайы жұмыс тобы құрылып, мәселе бақылауға алынды. Депутаттың айтуынша, әзірге баға өспейді, түпкілікті шешім Үкімет басшысының назарында. 

Дүйсенбай Тұрғанов, ҚР Парламенті Мәжілісінің депутаты:

- Мұнан басқа енді тікелей тапсырмасы энергетика министрлігіне берген: ол ТШО тікелей Атырау жылу электр орталығымен келісім шартқа отырсын деген. Қазіргі таңда Энергетика министрі хатын ТШО-ға жолдады. Алайда әзірге нақты жауап алынған жоқ. Соны күтіп отырмыз. Десе де бүгінгі таңда 30 сәуірге дейін биылғы жылға келісім шарт бар. Ол келісім шартта бағасы да көлемі де тұтынатын газдың көрсетілген.