​ Ауламыз автопаркке айналды : Авангард тұрғындары автобустардың соңғы аялдамасын көшіруді талап етуде

Атырау қаласының Авангард ықшамауданындағы №1 үйдің жанындағы соңғы аялдамаға қатысты дау күшейді. Ведомстволардан бірнеше рет ресми жауап алған тұрғындар енді тек шағыммен шектелмей, жағдайды өздері бақылауға кірісті.

Тұрғындар бірнеше күн бойы  «ешкім асыра сілтеп отыр» деп айта алмауы үшін терезе алдында отырып, қолдарына қалам мен блокнот алып, әрбір автобус кіріп-шығуын жазып отырды.

Тұрғындар күнделікті өмірлерінде тыныштық жоқ екенін айтады. Таңертең оларды оятатын – будильник емес, автобустардың мотор гуілі мен терезе алдындағы қатты жылдамдық. Күндіз де жағдай өзгермейді: автобустар кіріп-шығады, сигнал береді, қозғалтқыштарын өшірмей ұзақ уақыт тұрады. Пәтерлерде газдың иісі сезіліп, терезе алдына шаң қонады. Кейбір үйлерде төсек тартып жатқан науқастар бар, ал кейбірінде күндіз ұйықтай алмайтын кішкентай балалар өсіп келеді. Мұндай жағдайда адамдар өздерін тұрғын аулада емес, автопарк аумағында тұрғандай сезінеді.

Тұрғындардың айтуынша, бір ғана сағат ішінде автобустардың кіріп-шығуы тым жиі қайталанады. Мәселен, күндізгі 13:00–14:00 аралығында олар 43 рет кірген және 47 рет шыққан автобусты тіркеген. Барлығы бір сағат ішінде - 90 манёвр. Келесі күні дәл осы уақытта көрсеткіш одан да жоғары болып, 53 рет кірген және 49 рет шыққан автобусты санаған. Яғни бір сағатта 102 манёвр жасалған.

Автобустардың қозғалыс аралығы шамамен бір минутты құрайды. Ал екі сағаттық бақылау барысында тұрғындар тұйық арқылы 96 автобустың өткенін жазып алған.

Тұрғындардың айтуынша, автобустар алаңға ресми кестеден бұрын келе бастайды. Таңғы 05:50-де алғашқы машиналар пайда болып, 06:30-ға қарай олардың саны оннан асады. Ал ресми қозғалыс кестесі «Смарт Атырау» деректеріне сәйкес 06:40-та ғана басталуы тиіс.

Бұл соңғы аялдама арқылы барлығы 12 бағыт өтеді: №10, 11, 12, 14, 15, 50, 52, 61, 63, 64, 65 және 67. Автобустар сұйытылған газбен жүреді. Тұрғындардың айтуынша, олар аялдамада тұрған кезде қозғалтқыштарын жиі өшірмей, 10–15 минут бойы қосулы күйде қалдырады.

«Автобустардың қозғалысы кезінде шу 85–95 децибелге дейін жетеді. Бесқабатты екі үйдің арасындағы тар кеңістікте бұл дыбыс одан әрі күшейіп, тұрғындарға қатты әсер етеді. Ал ресми нормаларға сәйкес, тұрғын аймақтарда күндізгі рұқсат етілген деңгей — 55 децибел, түнгісі — 45 децибел ғана», - дейді олар.

Санитарлық органдардың жауаптарында көрсетілгендей, автобустардың айналу және аялдау алаңдары тұрғын үйлерден кемінде 50 метр қашықтықта орналасуы тиіс. Дегенмен, нақты қозғалыс қарқыны мен маршруттар санына қатысты талаптар бөлек регламенттелмеген.

Тұрғындардың айтуынша, ресми талаптарда көрсетілген 50 метрлік қашықтық сақталғандықтан, бұл шешім аялдаманы бұрынғы орнында қалдыруға негіз болған. Алайда олар нақты қозғалыс қарқыны мен автобустардың жиілігі мүлде ескерілмегенін айтады.

Қосымша сұрақтар да туындаған. Мәселен, Avtobys қосымшасында №10 бағыттың соңғы аялдамаға кіргені көрсетілмей қалған. Бірақ тұрғындардың айтуынша, автобустар әлі де келіп, жолаушыларды түсіріп, алаңда ұзақ уақыт тұрады.

Қазіргі уақытта тұрғындардың ұжымдық шағымы Санитариялық-эпидемиологиялық бақылау комитетінде қаралуда. Қосымша шу мен ауа сапасына қатысты өлшеу жұмыстары тағайындалған.

Алайда тұрғындар мәселе тек режимді түзету емес, аялдаманы көшіру екенін ашық айтып отыр. Олардың пікірінше, тұрғын үйлердің терезесінің алдында минут сайын автобус кіріп-шығатын көлік торабы болмауы тиіс.

«Біз автобустарға қарсы емеспіз. Біз соңғы аялдаманың дәл осы жерде орналасуына қарсымыз», — дейді олар.

Редакция қала әкімдігіне және тиісті қызметтерге қосымша сауал жолдап, нақты қозғалыс жүктемесін ескере отырып, аялдаманың орналасуын қайта қарау жоспарланған ба, түсіндіруді  сұрады.

Анастасия ШЕРСТЯНКИНА

Суреттер мен видеоны Құрманғазы көшесі, №1 үй тұрғындары жолдады

Бүгін, 16:07