Бизнес еңбек нарығының негізгі драйверіне айналды

Шағын және орта бизнес Қазақстандағы еңбек нарығының негізгі драйверіне айналды, – деп хабарлайды Aikyn.kz. 

Ұлттық статистика бюросының өзекті деректеріне сәйкес, ШОБ секторында бүгінде 4 527 381 адам жұмыспен қамтылған,  бұл – елдегі барлық жұмыспен қамтылған халықтың 48,6 пайызы. Соңғы 7 жылда сектордағы жұмыс орындарының саны 36,7 пайызға өсті (2018 жылы – 3,3 млн).

Жұмыс істеп тұрған ШОК субъектілерінің саны 63,5 пайызға өсіп, 2,2 млн бірлікке жетті. Өнім шығару 3,2 есе артып, 2025 жылдың қорытындысы бойынша рекордтық 104,8 трлн теңгеге жетті.

Елдегі кәсіпорындардың саны бойынша сауда саласы (35%) көш бастап тұр. Алайда бизнесті кеңейту кезінде жаңа жұмыс орындарын құрудың ең үлкен әлеуетін өңдеу өнеркәсібі, құрылыс және агроөңдеу байқатып отыр. Секторда әйелдер маңызды рөл атқарады, олар барлық ШОБ субъектілерінің 48,1 пайызын басқарады (оның ішінде ЖК арасында 52,6% және заңды тұлғалар арасында 28,1%).

7 жыл ішінде бизнесті дамытуға 10,2 трлн теңге бөлінді

«Даму» кәсіпкерлікті дамыту қорының жеңілдетілген кредиттеу, субсидиялау және кепілдік беру жөніндегі құралдары 2019-2026 жылдар аралығында жалпы кредит сомасы 10,2 трлн теңгеге 176 716 бизнес жобасын қамтыды.

2025 жылғы маусымда «Өрлеу» жеңілдетілген қаржыландыру бағдарламасы іске қосылды. Онда банк капиталының үлесі қаржыландырудың жалпы көлемінің жартысынан асады. 2025 жылғы сәуірден бастап «Даму» қорының базасында ШОБ және ірі инвестициялық жобалар үшін екі жаңа кепілдік қоры табысты жұмыс істейді. Ал 2025 жылғы желтоқсанда өңірлік ерекшеліктерін ескере отырып, ауылдарда және шағын қалаларда микро және шағын бизнесті дамытуға бағытталған «Іскер аймақ» бағдарламасы басталды.

«Өрлеу» және «Іскер аймақ» бағдарламасы бизнеске серпін берді

Жергілікті жерлерде жеке бизнесті ынталандыру үшін шағын қалалар мен ауылдарды дамытуға бағытталған «Іскер аймақ» ұзақмерзімді бағдарламасы іске қосылды. 2029 жылға дейін бағдарлама жалпы сомасы 1,2 трлн теңгеге 15 мыңға жуық бизнес-жобаны қолдайды. Бағдарлама агроөнімдерді қайта өңдеуге, азық-түлік, жиһаз, құрылыс материалдарын өндіруге және қолөнерге бағытталған. Республикалық деңгейде бизнес-бастамаларға «таза парақтан» тетіктері және «Өрлеу» жеңілдікті кредиттеу бағдарламасы қолдау көрсетеді. Басым секторлар үшін (өңдеуші өнеркәсіп, IT, туризм, креативті индустрия және логистика) жылдық 12,6 пайыздан аспайтын мөлшерлеме бойынша 7 млрд теңгеге дейінгі қаржыландыру лимиттері белгіленген.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.