Британиядан шыққан чемпион Головкинді үшінші раундта талдырмақ ниетте

Жалаң қолмен төбелес өткізетін Bare Knuckle Fighting Championship (BKFC) чемпионы Коннор Тирни қазақстандық боксшы Геннадий GGG Головкинге қолғапсыз жекпе-жекке шығуды ұсынды, деп хабарлайды Vesti.kz.

Британдық спортшының айтуынша, бұл айқас ұзаққа созылмайды.

"Мен қолғаппен жұдырықтасатын әлем чемпиондарына қарап шықтым. Енді дәл сол GGG-мен айқасқым келеді. Оны үш раундта жеңемін деп ойлаймын", - деп жазды Тирни әлеуметтік желіде.

MMAnews мәліметінше, Коннор Тирни 2024 жылдың тамызында BKFC UK (жалаң қолмен жекпе-жек лигасы) ұйымының жартылай орта салмақтағы чемпионы атанды. Ол BKFC 64 турнирінде Джонни Грэмді төрешілер шешімімен жеңіп, чемпион атанған. 2025 жылдың маусымында BKFC 77 турнирінде басты жекпе-жекте Дэнни Кристиді төртінші раундты 14-секундында құлатып, белбеуін сәтті қорғады. ОСы жеңістен кейін ол головкинді айқасқа шақырды. 

Посмотреть эту публикацию в Instagram

Публикация от Connor “The Brumtown Bomber” Tierney (@connortierneybtb)

Осы уақытта Геннадий Головкиннің есімі қайтадан жаңалықтарда жиі көріне бастады. Себебі ол Халықаралық бокс Даңқ залына енуі мүмкін деген болжам бар. Қазақстандық боксшы 2026 жылғы дауыс берудің басты фавориттерінің бірі саналады.

Головкин соңғы рет рингке 2022 жылдың қыркүйегінде шыққан. Ол кезде ол Сауль Канело Альвареспен үшінші мәрте кездесіп, ұпай санымен жеңіліп қалған. Олардың алғашқы кездесуі 2017 жылы даулы тең нәтижемен аяқталған, ал 2018 жылғы екінші жекпе-жекте төрешілер жеңісті Альвареске берген болатын.

Қазір Головкин World Boxing атты жаңа ұйымның Олимпиадалық комиссиясын басқарады және Қазақстанның Ұлттық Олимпиадалық комитетінің президенті қызметін атқарады. Алайда аты аңызға айналған боксшы карьерасын аяқтағанын ресми жариялаған жоқ.

Vesti.kz сайтын осы әлеуметтік желілерінде оқыңыздар

Vesti-де Tik Tok та бар @vestikzsport