Былтыр төлем карталары арқылы 1 миллиардтан астам транзакция жүргізілді

АСТАНА, 18 сәуір – Sputnik. Ұлттық банк 2025 жылғы төлем қызметі нарығының даму барысы туралы шолу жариялады, деп хабарлайды Sputnik Қазақстан.

Операциялар көлемі 2024 жылмен салыстырғанда Банкаралық ақша аударымдарының жүйесі арқылы 4,3%-ға, Банкаралық клиринг жүйесі арқылы 21%-ға көбейді.

"2025 жылы Банкаралық төлем карталары жүйесі арқылы 1,04 млрд транзакция өңделді. Ұлттық банктің төлем жүйелеріндегі үздіксіз жұмыс коэффициенті 99%-дан асады", - деп жазылған хабарламада.

Қазіргі уақытта төлем картасын, мобильді қосымша мен QR-кодты пайдалану әдісі халыққа тауар мен қызметке ыңғайлы, жылдам әрі қауіпсіз төлем жүргізуге мүмкіндік береді. 2025 жылдың нәтижесі бойынша 10 транзакцияның 8-і интернет және мобильді банкинг (оның ішінде QR-кодты қолдану) арқылы жүргізілді.

Халықаралық ақша аударымдары жүйеcі (ХААЖ) шетелден ақша алуда және сыртқа ақша аударуда сұранысқа ие тәсілдің бірі ретінде қала береді. Бұл ретте, шот ашпай ХААЖ арқылы жүргізілген барлық операцияның 97%-ы Қазақстан мен басқа елдер арасындағы трансшекаралық аударымдарға тиесілі.

Төлем ұйымдары банк сервистеріне қосымша төлем қызметтерін ұсыну арқылы өз инфрақұрылымын кеңейте бастады. 2025 жылы төлем ұйымдарының сервисі арқылы жасалған айналым өткен жылмен салыстырғанда 16,2%-ға көбейді.