ЕЭК Әзербайжан мен Қытайдан әкелінетін алюминий таспасына демпингке қарсы бажды ұзартты

АСТАНА, 15 қазан – Sputnik. Еуразиялық экономикалық комиссия (ЕЭК) алқасы Әзербайжан мен Қытайдан әкелінетін алюминий таспасына қатысты қолданыстағы демпингке қарсы баж салығын ұзарту туралы шешім қабылдады, деп хабарлады ЕЭК.

Аталған шараның қолданыс мерзімі 2025 жылғы 23 қазанда аяқталуға тиіс болған. Алайда ЕЭК-нің Ішкі нарықты қорғау департаментіне өтініш келіп түсіп, нәтижесінде 2025 жылғы 30 маусымда демпингке қарсы тергеу қайта басталды.

Сол себепті баж салығының қолданыс мерзімі 2026 жылғы 29 маусымға дейін ұзартылды, деп түсіндірді комиссия.

"ЕАЭО-ның нормативтік базасына сәйкес, қолданыстағы демпингке қарсы шараны қайта тергеу жүргізілген кезең ішінде ұзартуға болады. Бұл тергеу басталған күннен бастап 12 ай ішінде аяқталуға тиіс", – деп еске салды ЕЭК-тің сауда блогы.

Әзербайжан мен ҚХР-дан әкелінетін алюминий таспасына қарсы демпингке қарсы баж салығы алғаш рет 2020 жылғы 22 қыркүйекте енгізілген.

Баж мөлшері:

Әзербайжан өнімдері үшін кедендік құнның 16,18% мөлшерінде;

Қытай өнімдері үшін кедендік құнның 13,14% мөлшерінде белгіленген.

Сондай-ақ ЕЭК Қытайдан әкелінетін алюминий фольгасы мен титан диоксидіне де демпингке қарсы шаралар қолданатынын мәлімдеді.

Баж ставкалары мынадай:

Алюминий фольгасы үшін — 17,16%-дан 20,24%-ға дейін,

Титан диоксиді үшін — 14,27%-дан 16,25%-ға дейін.

Сонымен қатар фольга бойынша Xiamen Xiashun Aluminium Foil Co., Ltd. компаниясы қабылдаған баға міндеттемелері мақұлданды — бұл талаптар орындалған жағдайда осы өндірушінің тауарларына демпингке қарсы баж салығы салынбайды.

Бұл ретте жыл сайынғы импорт көлемі белгіленді, олардың шегінде демпингке қарсы баждар алынбайды.