Елімізде алғаш рет науқастардың жүрегіне соңғы шыққан кардиостимулятор қойылды

Алматыдағы Кардиология және ішкі аурулар ғылыми-зерттеу институты отандық медицинадағы кезекте межені бағындырып, екі науқасқа соңғы буынғы үш камералы кардиостимулятор орнату операциясын атқарды, деп жазады Egemen.kz.

Аталған медициналық ғылыми-зерттеу институты CRT-P Amvia Sky құрылғысын орната отырып, жүректі физиологиялық стимуляциялау жөніндегі мастер-класын қоса атқарды. Аталған құрылғы кәдімгі стандартты кардиостимуляторлардан жүрек ырғағы өзгергіштігі табиғи ырғаққа барынша ұқсастығымен айрықшаланады.

Екі науқасқа да операцияны аритмология қызметінің аға ординаторы Асылхан Паримбеков Польшаның Краков қаласынан келген профессор Кшиштоф Бочардың қатысуымен жасады.

AV-блокададан кейін, жүрекшелер абляциясы мен кардиохирургиялық араласуларды өткерген, жүрек қарыншаларының жиырылу біркелкілігі бұзылып, жүрек қызметі жеткіліксіздігі, сол жақ қарыншаның жиырылу фракциясы төмендеген жағдайда пациенттерге арнайы үш камералы кардиостимуляторлар (CRT-P) қажет.

Мастер-класқа қатысқан хируругтар кардиоресинхрондау терапиясы қағидаттарымен танысты. Бұл терапияның клиникалық тәжірибеде қолданылуы, жүректің өткізгіштік жүйесі аймағына имплантация жасау көрсетілді.

«Мастер-кластар мамандарымыздың медицинаның соңғы жетістіктерінен хабардар болуына, жаңа емдеу әдістері мен технологияларды меңгеріп, көрсетілетін медициналық көмектің сапасын арттырып, кәсіби өсуіне мүмкіндік береді. Тәжірибе алмасу дәрігерлердің кәсіби қызметке қажетті білімдерін, біліктілік пен дағдыларын жетілдіруге ықпал етеді», – дейді институттың Басқарма төрағасы Рүстем Төлеутаев.

Асылхан Бүркітбайұлының айтуынша, үш камералы CRT-P кардиостимуляторлары қарыншалардың синхронды жұмысын қамтамасыз етіп, жүректің қан айдау қызмет мен үздіксіз жұмысын жақсартады. Кардиоресинхрондау терапиясы жүрек қызметінің жеткіліксіздігін емдеудің маңызды компоненті болып қала береді, ал үш камералы құрылғыларды қолдану ұзақ мерзімді клиникалық нәтижелерді жақсартады.

«Жүректің өткізгіштік жүйесіне бағытталған CRT-P имплантациясы жүрек қызметі жеткіліксіздігі бар науқастарда ұзақ мерзімді нәтижелерді жақсартуға жаңа мүмкіндік ашады», – дейді Жүрек ырғағы мен өткізгіштігі бұзылыстары бөлімшесінің меңгерушісі Бағдат Ахыт.

Сонымен екі операция да сәтті өтті. Енді озық кардиостимулятор орнатылған науқастар ел қатарлы өмір сүріп, қалаған ісімен, спортпен айналысып, саяхаттай алады.