Есік алдына әкеп тастаған : 14 жастағы жүкті қыздың анасы зорлықтың қалай болғанын айтты

АЛМАТЫ, 2 желтоқсан – Sputnik. Жамбыл облысында 14 жастағы мүгедек қыз жүкті болып қалды. Sputnik Қазақстан тілшісі Қордай ауданына арнайы барып, жасөспірімнің анасымен сұхбаттасты.

© Sputnik / Айдана ДайыроваЖамбыл облысында 14 жастағы мүгедек қыз жүкті болып қалды

Жамбыл облысында 14 жастағы мүгедек қыз жүкті болып қалды

© Sputnik / Айдана Дайырова

Гүлайым Нұрақынованың (аты-жөні өзгертілген) айтуынша, 14 жастағы қызының етегін әркім бір ашып, әбден мазақ еткен. ІІ топтағы мүгедек, ақыл-есі кем деген диагнозы бар қызын ер адамдар алдап шақырып алып, жыныстық қатынасқа түскен.

"4 мамыр қызым жоғалып кетті. 102-ге хабарласып, іздедік. Сөйтсек қара көлік есік алдына таң ата әкеп тастаған. Қонақ үйге апарып, жыныстық қатынасқа түскен. Қызым кіммен барғанын, не болғанын бәрін айтып отыр. Телефонға дауыстары да жазылып қалған", - дейді анасы.

Гүлайым Нұрақынованың айтуынша Жанар ойнап шығып кете береді. Тіпті қамап ұстаған кездері де болған.

"Сол 4 мамыр күні арыз жаздым. Содан кейін жаңағы зорлағандар басқаларға да айтқан ба, басқа ер адамдар бірнеше рет тиіскен. Саябақтағы әжетханада да тиіскен. Қызымды ылғи гинекологқа апарып, тексеріп жүремін. Қыз болатын, одан кейін тексеруге апарсам қыз емес деді. Ең бірінші болып Жарас тиісті", - дейді Гүлайым.

© Sputnik / Айдана ДайыроваЖамбыл облысында 14 жастағы мүгедек қыз жүкті болып қалды

Жамбыл облысында 14 жастағы мүгедек қыз жүкті болып қалды

© Sputnik / Айдана Дайырова

Қыз кіммен болғанын жіпке тізіп анасына айтып отырған. Бұған дейін полиция, прокуратураға барып шағымданған. Кейін қолды бір сілтеп, бір Құдайға тапсырдым дейді.

"Өзімді ана құқынан айырды. Қайта-қайта қызым сондай жағдайға тап бола бергендіктен мені кінәлі етіп шығарды. Сот арқылы балаларымды қайтарып алдым. Соңғы кезде қызым жеміс-жидек жегіш болып кетті, тексертсем жүкті. 12 тамызда полицияға арыз жаздым", - дейді жасөспірімнің анасы Гүлайым.

Жасөспірім қазір ауруханада, сәбиіне күтім бойынша емделіп жатыр. Бірақ жүкті екенін білмейді. Ал қыздың әкесі бұл жағдайдан мүлдем бейхабар. Анасы айтуға қорыққан.

Sputnik Қазақстан тілшісі жасөспірімнің өзінен де сұхбат алды.

"Өздері машинаға салып алып кетті. Түнгі бірде далаға шықтым. Таныс адамдар, Жарас, Марсель, Сағыныш, оның досы, Олжас. Түнде шығасың ба деп сұрайды. Марсель 24-те, Жарас 22-де, Сағыныш 17-де, Олжас 22-де. Телефонымды 3-4 үлкен еркекке берген. Олар қоңырау шалды. Жасым 14-те. Үлкен еркектер екенін біліп алдым. Жастары 22-де. Нөмерімді ауыстырсам да әр номерден жаза береді", - дейді 14 жастағы жүкті қыз.

Жанар 3,5 ай жүкті. Құрсағындағы баласының жүрек соғысы жақсы.

© Sputnik / Айдана ДайыроваЖамбыл облысында 14 жастағы мүгедек қыз жүкті болып қалды

Жамбыл облысында 14 жастағы мүгедек қыз жүкті болып қалды

© Sputnik / Айдана Дайырова

"Аман-есен туып алса өзім-ақ бағып алам. Бірақ қылмыскерлер жазасын алсын", - дейді жасөспірімнің анасы.

Жамбыл облыстық полиция департаменті қылмыстық іс қозғаған.

"Кәмелетке толмаған қызға қатысты заңсыз әрекеттер туралы анасының арызы бойынша полиция дереу сотқа дейінгі тергеп-тексеруді бастады. Күдікті жедел анықталып, полиция бөлімшесіне жеткізілді. Қазір барлық қажетті тергеу және процессуалдық іс-әрекеттер жүргізіліп жатыр. Қылмыстық іске қатысушылардың барлық жауаптары тексеріліп, дәлелдер жиналып жатыр", - дейді полиция.