FIRST байқауы: Абай облысында жас өнертапқыштар бас қосты

Абай облысында жас өнертапқыштар мен болашақ инженерлер бас қосты, деп хабарлайды 24KZ. Бұл «FIRST» халықаралық байқауының «Abay First Regional 2025» аймақтық кезеңі. Байқаудың мақсаты – оқушыларды STEM бағытына баулу, яғни ғылым, технология, инженерия салаларына қызығушылығын арттырып, қабілетін жетілдіру.

Аймақтық кезеңге Алматы қаласы, Жетісу, Қарағанды, Ақмола және Абай облыстарынан 260-қа жуық оқушы қатысып, жобаларын көпшілікке таныстырды. Жас инноваторлар қоғамдағы өзекті мәселелерді шешуге бағытталған түрлі робот-техникалық жүйелер әзірлеп, бақ сынасты.

Әсем Нүскенова, облыстық Білім басқармасы басшысының орынбасары:

- Осыған дейін Алматы, Астана қалаларында өткен болатын аймақтық сайыс. Міне, Абай өңірінде осы балаларымыз үш бағыт бойынша сайысқа дайындалып жатыр. Сайысқа дейін бірнеше достық кездесулер де өтеді. Ол үлкен алаңдарда балалар бір-бірлеріне жақсы жобаларды көріп, жетістіктерін бөліседі. Тәжірибелерін бөліседі.

Байқау кезінде «Жас Ұлан» мамандандырылған ерлер лицейінің оқушылары ерекше көзге түсті. Олар құрамында бағалы металдары бар археологиялық жәдігерлерді анықтауға арналған робот жасап шығарған. Құрылғы GPS навигаторы және Wi-Fi роутерімен жабдықталған. 1,5 шақырым қашықтықтан басқарылады.

Захар Захаров, лицей оқушысы:

- Біздің жобамыздың мақсаты – Екінші дүниежүзілік соғыс кезеңінен қалған тарихи заттарды тауып, жас ұрпақтың өткенге деген қызығушылығын арттыру. Бұл материалдар Қазақстан тарихы пәнін тереңірек меңгеруге көмектеседі. Құрылғы арнайы металдармен жабдықталған, ол магниттік толқындар арқылы соғыс жылдарынан сақталған жәдігерлерді анықтауға мүмкіндік береді.

Ұйымдастырушылардың айтуынша, байқау балаларды командалық жұмысқа үйретіп қана қоймай, олардың инженерлік ойлау қабілетін дамытады. Ал жастардың өзі бұл сайыстың оларға жаңа мүмкіндік беретінін атап өтті.

Мадияр Қарымсақ, қатысушы:

- Робототехникаға осы жылы ғана қосылдым. Қызығушылығым жоғары болды. Біздің команданың капитаны робототехника саласында үшінші жыл жүр. Біз осы қазіргі роботомызды жарты айда жинадық десек болады. Бүкіл деталь, шассилер келген жоқ, сондықтан қысқа мерізмде жинадық.

Байқау нәтижесінде екі санат бойынша алты команда республикалық кезеңге жолдама алды. Сол жерде бағы мен бабы қатар келген команда халықаралық жарыста ел намысын қорғайды.

Авторлары: Рүстем Қайратұлы, Мәди Базарбеков