Гонконг пен Қытайдың материктік бөлігінің бірлескен делегациясы Қазақстанға келеді

Гонконг, Қытайдың материктік бөлігі және Орталық Азия арасындағы сауда, инвестиция және өзара байланысты нығайту
2026 жылғы 28 мамыр — Қытай Халық Республикасының Гонконг арнайы әкімшілік ауданының (HKSAR) Бас атқарушысы Джон Ли бастаған жоғары деңгейлі делегация 1–3 маусым аралығында Қазақстанға сапармен келеді. Бұл сапар сауда, инвестиция және өңірлік өзара байланысты нығайтуға бағытталған Орталық Азия бойынша кең ауқымды миссия аясында ұйымдастырылып отыр.
Миссияны HKSAR Үкіметі мен Гонконг сауданы дамыту кеңесі (HKTDC) бірлесіп ұйымдастырады. Оның құрамына HKSAR Үкіметінің жоғары лауазымды өкілдері және сауда, қаржы, логистика, инфрақұрылым және инновациялар, энергетика, тау-кен өнеркәсібі, табиғи ресурстар мен химия саласы, фармацевтика және автомобиль өнеркәсібі салаларын таныстыратын бизнес-делегация кіреді. Бұл - Гонконгтың Орталық Азияға жасаған ең ірі әрі ең ауқымды бизнес-миссиясы болмақ.Сонымен қатар, алғаш рет делегация құрамына БАҚ өкілдері де енгізілді.
Сапардың мақсаты - Гонконг пен Қазақстан арасындағы экономикалық байланыстарды тереңдету, трансшекаралық инвестициялар мен сауда мүмкіндіктерін кеңейту, сондай-ақ екі тараптың бизнес қауымдастықтары мен институттары арасындағы ынтымақтастықты нығайту. Миссия Қытайдың материктік бөлігіндегі компаниялардың Қазақстан нарығына шығу үшін Гонконгты платформа ретінде пайдалануына қолдау көрсетеді, сонымен қатар қазақстандық компаниялар үшін Үлкен шығанақ аймағына Гуандун–Гонконг–Макао Үлкен шығанақ өңірі (GBA) және жалпы Қытай нарығына шығатын қақпа ретінде Гонконгтың мүмкіндіктерін ілгерілетеді. Бұл Гонконгтың Қытайдың материктік бөлігі, Орталық Азия және «Бір белдеу, бір жол» бастамасына қатысушы өзге нарықтарды байланыстыратын екіжақты хаб ретіндегі рөлінің артып келе жатқанын көрсетеді.
Соңғы деректер Гонконг бизнесінің Қазақстанға деген қызығушылығының артып отырғанын көрсетеді. Қазақстанда тіркелген гонконгтық заңды тұлғалар мен филиалдар саны 2025 жылғы ақпаннан 2026 жылғы ақпанға дейін 158-ден 254-ке дейін, яғни 61%-ға өсті. Бұл соңғы төрт жылдағы рекордтық көрсеткіш болды.
Миссия Қазақстанның экономикалық реформаларды жалғастырып, халықаралық инвестицияларды белсенді тартуы және өңірлік сауда-логистикалық хаб ретіндегі рөлін күшейтуі аясында жүзеге асырылуда.
Қазақстанға сапар барысында Гонконг делегациясы Қазақстан Үкіметінің өкілдерімен, бизнес көшбасшыларымен және ірі қазақстандық компаниялардың өкілдерімен кездесіп, сауда, инвестиция, инфрақұрылымды дамыту, логистика және қаржылық өзара байланыс салаларындағы ынтымақтастық мүмкіндіктерін талқылайды. Делегация сондай-ақ Орталық Еуразиядағы ең ірі халықаралық инновациялық кластер - Astana Hub және оның Халықаралық жасанды интеллект орталығына барып, стартап-экожүйелер, цифрлық трансформация, жасанды интеллект және smart city бағыттары бойынша ынтымақтастықты дамыту мәселелерін қарастырады.
HKTDC төрағасы профессор Фредерик Ма:
«Қазақстан Орталық Азиядағы ең ірі экономика әрі «Бір белдеу, бір жол» бастамасының маңызды торабы ретінде экономиканы әртараптандыру мен инфрақұрылымды дамыту бағытында елеулі өзгерістерді бастан өткеріп жатыр. Бұл сауда және инвестициялық ынтымақтастық үшін зор әлеует қалыптастырады. Осы сапар арқылы біз Гонконгтың супербайланыстырушы әрі қосымша құн қалыптастыратын орталық ретіндегі рөлін одан әрі нығайтуды көздейміз. Біз капитал, технология және сараптама алмасуын дамыту үшін ішкі және сыртқы байланыстардағы артықшылықтарымызды пайдаланамыз. HKTDC бизнес-серіктестерді байланыстыру, мәмілелер жасау және жаңа нарықтарға шығу қызметтері арқылы әлеуетті серіктестерге қолдау көрсетуге дайын», – деді.
GoGlobal Task Force секілді бастамалар арқылы, оның негізгі мүшелерінің бірі болып табылатын HKTDC өңірлік өзара байланысты нығайтуға, «Бір белдеу, бір жол» аясындағы ынтымақтастықты бірлесіп дамытуға және сауда, логистика, инновациялар мен технологиялар, сондай-ақ қаржы салаларындағы тиімді серіктестікті ілгерілетуге ұмтылады.
Өзгеріп жатқан геосаяси және экономикалық жағдай аясында Гонконг сенімді әрі тұрақты халықаралық қаржы орталығы ретіндегі рөлін нығайтуды жалғастыруда. Ол халықаралық капитал, трансшекаралық қаржыландыру және инвестициялық ағындар үшін тұрақты әрі тиімді орта ұсынады. Қытайдың материктік бөлігі мен халықаралық нарықтарды байланыстыратын жаһандық қаржы хабы ретінде Гонконг көпжақты ынтымақтастықты қолдауға және Орталық Азия мен әлемдік нарықтар арасындағы байланысты кеңейтуге қолайлы мүмкіндіктерге ие.
Қазақстан экономиканы әртараптандыруды және өңірлік өзара байланысты кеңейтуді жалғастырып келеді, бұл халықаралық серіктестік, инфрақұрылымды дамыту және инвестициялар үшін жаңа мүмкіндіктер қалыптастырады. Сауда және инвестициялық байланыстардың нығаюына қарай Қазақстан Гонконг үшін, әсіресе логистика, қаржы, энергетика және трансшекаралық байланыс салаларында барған сайын маңызды серіктеске айналып келеді.
2025 жылы Қазақстан Гонконгтың Орталық Азиядағы ең ірі сауда серіктесі және негізгі экспорттық нарығы болды. Сондай-ақ, 2026 жылғы қаңтардағы жағдай бойынша Гонконг Қазақстандағы ең ірі шетелдік инвесторлар арасында әлем бойынша 10-орынды және Азия елдері арасында 4-орынды иеленді. Халықаралық бизнес пен трансформация саласындағы көпжылдық тәжірибеге сүйене отырып, Гонконг пен Қытайдың материктік бөлігі Қазақстанның трансформациясына қолдау көрсетуге және екіжақты ынтымақтастықтың жаңа мүмкіндіктерін ашуға тиімді жағдайда тұр.