ХВҚ Киевке 700 млн доллар несие беру туралы шешім қабылдайды

АСТАНА, 25 маусым – Sputnik. Халықаралық валюта қорының (ХВҚ) басшылығы алдағы апталарда Украинаға 700 миллион долларға жуық несие қаражатын бөлу туралы түпкілікті шешім қабылдайды, деді ХВҚ-ның коммуникациялар департаменті директоры Джули Козак.

"Басқарма бұл мәселені алдағы апталарда талқылайды деп күтілуде", - деді ол брифингте Киев үшін жаңа несие траншын бекіту мерзіміне түсініктеме бере отырып.

Козак Украинаға 12 маусымда алдын ала келісілген 690 миллион долларды төлегеннен кейін жаңа көмек бағдарламасы бойынша төлемдердің жалпы сомасы 2,2 миллиард долларға жететінін айтты.

ХВҚ басшылығы бұған дейін Украинаға 8,1 миллиард доллар көлеміндегі жаңа төрт жылдық несие бағдарламасын мақұлдаған. ХВҚ басқарушы директоры Кристалина Георгиева қор Киевке берілетін жаңа несиеге байланысты ерекше жоғары тәуекелдерді мойындайтынын, қарызды өтеу сыртқы көмек пен биліктің әрекетіне байланысты екенін атап өтті.