Ирактағы ірі мұнай өңдеу кешеніндегі өрт: 13 адам жарақат алды

Ирактың Салах-ад-Дин провинциясында орналасқан елдегі ең ірі «Байджи» мұнай өңдеу зауытында дүйсенбі күні өрт шықты.

Тілсіз жау кешендегі жанармай нысандарының бірінде жоспарлы техникалық қызмет көрсету жұмыстары кезінде тұтанған. 

Жедел қызметтердің мәліметінше, өрт қысқа уақыт ішінде ауыздықталған. Алайда оқиға адам шығынынсыз аяқталған жоқ: бір жұмысшы қаза тапты. Соңғы деректерге сәйкес, түрлі дәрежеде жарақат алған, негізінен күйік шалған 13 адам бар.

Ирактың Мұнай министрлігі өрттің толық оқшауланғанын және оның жоспарлы жөндеу жұмыстары барысында шыққанын растады. Оқиғаның себеп-салдарын анықтау, сондай-ақ келтірілген шығынды бағалау мақсатында өрт болған учаскеде өндіріс уақытша тоқтатылды.

Айта кетейік, Байджи мұнай өңдеу зауытының тәуліктік қуаты 290 мың баррельді құрайды. Кешен ел астанасы Бағдад қаласынан шамамен 180 шақырым солтүстікте орналасқан. Бұл кәсіпорын Ирак экономикасы үшін стратегиялық маңызға ие, себебі ұлттық мұнай өңдеу қуатының шамамен үштен бір бөлігі осы зауыттың үлесіне тиесілі.