Ислам даму банкінің қолдауымен төрт жаңа су қоймасы салынады

АСТАНА, 3 шілде – Sputnik. Қазақстанда Ислам даму банкінің қолдауымен төрт жаңа су қоймасы салынып, жеті су қоймасы реконструкцияланады, деп хабарлады Су ресурстары және ирригация министрлігі.

Су ресурстары және ирригация министрі Нұржан Нұржігітов пен Ислам даму банкінің президенті Мұхаммед Сулейман Әл-Джассер банкпен бірлесіп іске асырылып жатқан "Климатқа төзімді су ресурстарын дамыту" жобасының алғашқы кезеңінің жүзеге асырылу барысын талқылады.

Бүгінде барлық ұйымдастыру жұмысы толық аяқталып, халықаралық консультанттар айқындалды. Сонымен қатар ирригация каналдарын реконструкциялауға бағытталған 88 жоба бойынша құрылыс-монтаж жұмыстары басталды. Бұдан бөлек, су қоймаларын салу және реконструкциялау жұмыстарын жүзеге асыратын мердігер ұйымдарды іріктеу рәсімдері жүргізіліп жатыр.

"Жалпы Ислам даму банкімен жасалған келісім аясында 4 жаңа су қоймасын салу, қолданыстағы 7 су қоймасын реконструкциялау, сондай-ақ жалпы ұзындығы 2,8 мың шақырым ирригация каналдарын реконструкциялау және күрделі жөндеу бойынша 151 жобаны жүзеге асыру жоспарланған", - деп жазылған хабарламада.