Макрон Франция ядролық арсеналын арттыратынын мәлімдеді

Әлемдегі стратегиялық тұрақсыздық жағдайында Франция өзінің ядролық арсеналын арттырады, сондай-ақ Германияны қоса алғанда, басқа еуропалық елдермен ядролық тежеу саласындағы ынтымақтастықты кеңейтеді, деп мәлімдеді Франция президенті Эммануэль Макрон, деп хабарлайды Arasha.kz.

Ол бұл шешімге Ресейдің Украинаға қарсы соғысын, Қытайдың әскери қуатының артуын және АҚШ-тың қорғаныс саясатындағы басымдықтарының өзгеруін себеп ретінде көрсетті.

АҚШ-тың сыртқы саясатының өзгеруі аясында француздық «ядролық қолшатырды» ЕО-ның басқа елдеріне тарату мүмкіндігі туралы бұған дейін де хабарланған болатын. Макрон мен Германия канцлері Фридрих Мерц дүйсенбі күні ядролық мәселе бойынша бірлескен жұмыс тобының құрылғанын растады. Мерцтің айтуынша, жыл соңына дейін нақты қадамдар жасалады, соның ішінде Германия Францияның ядролық жаттығуларына қатысатын болады.

Макрон әлемдегі соңғы оқиғалар ядролық қару қолданылуы мүмкін қақтығыстардың ықтималдығы артып келе жатқанын көрсететінін айтып, Париждің жаңартылған ядролық доктринасын «кеңейтілген тежеу» деп атады.

Ол тек Германия ғана емес, сонымен қатар Нидерланды, Бельгия, Дания және Польша да Франциямен ядролық саладағы ынтымақтастыққа қызығушылық танытқанын еске салды.

Макрон сондай-ақ белгілі бір жағдайларда француз ядролық қаруын басқа елдерде орналастыру мүмкіндігін жоққа шығармады, бірақ оны қолдану туралы бұйрықты тек Франция президенті ғана бере алатынын баса айтты.

Сонымен қатар, Макронның сөзінше, Франция ядролық оқтұмсықтар санын көбейтеді және оның нақты қаншаға жететінін ресми түрде жарияламайды. Қазіргі ресми мәліметтер бойынша, Францияда 300-ге жуық оқтұмсық бар.

Өткен аптада Ресей билігінің өкілдері Франция мен Ұлыбританияны Украинаға ядролық қару жасауға арналған компоненттерді беруге тырысып жатыр деп айыптады. Үш ел де бұл мәлімдемелерді теріске шығарды.

2 наурыздағы өз сөзінде Макрон Украинамен ядролық саладағы ықтимал ынтымақтастық туралы ештеңе айтқан жоқ.