Мәжілісте Алматыдағы Hilton қонақүйіне қатысты дау көтерілді

Мәжіліс депутаты Ермұрат Бапи Парламенттің жалпы отырысында Hilton Almaty қонақүйіне қатысты жағдайды көтеріп, Үкіметке шұғыл депутаттық сауал жолдады.

Депутаттың айтуынша, Алматы қалалық Әділет басқармасының шешімі негізінде қонақүйді қазіргі меншік иесінен тартып алу, қызметкерлерді ғимараттан шығару және нысанды күштеп босату әрекеттері жүргізіліп жатыр.

Ермұрат Бапидың мәлімдеуінше, қонақүйде шамамен 250 адам жұмыс істейді. Оның сөзінше, бұл жағдай шетелдік туристер орналасқан қонақүй ішінде болып жатқандықтан, елдің халықаралық беделіне де кері әсер етуі мүмкін.

Депутат сондай-ақ бұл әрекеттердің артында Қайрат Сатыбалды мен «Ескі Қазақстан» ықпалы тұрғанын мәлімдеді. Оның пікірінше, мүлікті қайта бөлу әрекеттері заң үстемдігіне күмән тудырып отыр.

Мәжілісмен тиісті мемлекеттік органдардан жағдайға шұғыл араласып, құқықтық баға беруді талап етті.

Әзірге Алматы қаласының Әділет басқармасы мен өзге ресми органдар бұл мәселеге қатысты толық түсініктеме берген жоқ.