Парламент халықаралық орталық құру келісімін ратификациялады

АСТАНА, 16 қазан – Sputnik. Сенат депатуттары қылмыстық жолмен алынған кірістерді заңдастыруғк және терроризмді қаржыландыруға қарсы халықаралық орталықты құру туралы келісімді ратификациялайтын заңды мақұлдады, деп хабарлайды Sputnik Қазақстан тілшісі.

Келісімнің негізгі мақсаты - ТМД елдерінің ұлттық экономикалары мен қаржы жүйелерін, қылмыстық кірістерді жылыстату және терроризмді қаржыландыру қатерлерінен қорғау. Ол үшін ақпараттық жүйе ретінде жұмыс істейтін халықаралық орталық құрылып отыр. Соның негізінде ТМД елдерінің қаржылық барлау бөлімшелері өзара ақпарат алмасады.

Орталықтың міндеттері:

ақшалай қаражаттың транзиттік қозғалысын, активтердің түпкілікті орналастырылуын, сондай-ақ салықтық қылмыстар мен сыбайлас жемқорлық бойынша мәліметтер алмасу;

трансшекаралық қылмыстық топтардың қызметін талдау;

ұлттық және халықаралық деңгейде қылмыстық жолмен алынған кірістерді заңдастыру және терроризмді қаржыландырумен байланысты тәуекелдерді бағалау;

кірістерді заңдастыру және терроризмді қаржыландыруды алдын алу;

халықаралық стандарттар мен ұсынымдарды алдын-ала әзірлеу;

қаржы мониторингі және тәуекелдерді бағалау саласындағы мамандарды оқыту;

олардың біліктілігін арттыру және қаржы институттары, құқық қорғау органдары және басқа да мүдделі тараптар арасындағы ынтымақтастықты нығайту.

"Бүгінде дүние жүзінде жасанды интелекттің ерекше дамуына байланысты, бұл халықаралық орталықтың құрылуы өте маңызды. Себебі орталық қаржылық ақпаратты жан-жақты зерделейтін заманауи ақпараттық-талдау жүйесі ретінде ұйымдастырылған", - деді сенатор Сұлтанбек Макежанов.

ТМД атқарушы комитетінің ақпараты бойынша орталықтың талдау жүргізуге арналған тиісті технологиялық платформасы қазірдің өзінде жоба ретінде іске қосылып, өз тиімділігін көрсетті.

Айта кетері, орталықты құру туралы келісім ТМД мемлекет басшылары 2023 жылдың қазан айында Бішкек қаласында қол қойған болатын. Бүгінде оны Армения, Беларус, Қырғыстан, Ресей, Тәжікстан және Өзбекстанның парламенттері ратификациялады.