Петропавлда тарақандар өріп жүрген гимназияның директоры жұмыстан шығарылды

Солтүстік Қазақстан облысында ата-аналар Петропавлдағы гимназия асханасында санитарлық талаптың сақталмауына қатысты шағым түсірген. Өңір әкімдігі осы шағым негізінде аймақ мектептерінің асханасы түгел тексерілетінін хабарлады, деп жазады Egemen.kz.

Фото: Ашық дереккөзден

Тексеруге қаладағы «Абай» атындағы мамандандырылған мектеп-гимназия асханасында тарақандардың өріп жүруі мен тамақ сапасының сын көтермеуі түрткі болған. 

Өзі басқарып отырған мектеп асханасында тиісті деңгейде қадағалау жасамаған директор қызметінен босатылды.

«Оқушыларды тамақтандыру қызметін көрсеткен кәсіпкермен келісімшартты бұзу рәсімі басталды. Жақын арада мектептегі тамақтандыру қызметтерін көрсетуге арналған жаңа конкурс жарияланады», делінген әкімдік таратқан хабарламада.

Қазір осы мәселеге қатысты аймақ әкімінің тапсырмасымен ведомствоаралық комиссия құрылған.