Петропавлда ыстық су құбыры жарылып, 25 адам баспанасыз қала жаздады

Солтүсік Қазақстан облыстық Төтенше жағдайлар департаменті баспасөз қызметінің мәліметінше, оқиға Украин көшесінде орналасқан екі қабатты тұрғын үйде болған.

Пәтерлердің бірінде ыстық су құбыры жарылған. Санаулы минуттардың ішінде ыстық су жертөле астындағы кеңістікке жайыла бастаған. Салдарынан сегіз пәтерді су басу қаупі төнген. Бұл пәтерлерде барлығы 25 адам тұрады. Ағаштан салынған нысан қайнаған судың әсерінен қатты зақымдануы мүмкін болған. 

Оқиға орнына жедел жеткен құтқарушылар апат салдарын жою жұмыстарына бірден кірісті. Арнайы жабдық — мотопомпа көмегімен жертөлеге толған су сорылып шығарылды. Мамандар үйлесімді әрі шұғыл әрекет етіп, нәтижесінде судың жайылуына жол бермей, тұрғындардың мүлкіне келетін шығын барынша азайтылды. Оқиға барысында ешкім зардап шеккен жоқ.

Бұған дейін Петропавлда өндірістік цехте шыққан өрт роботтың көмегімен сөндірілгенін жазған едік.