Путин Ресейдің ҰҚШҰ ға 2026 жылы төрағалығы кезіндегі ұраны қандай болатынын айтты

АСТАНА, 27 қараша – Sputnik. Ресейдің 2026 жылғы ҰҚШҰ төрағалығы "Көпполярлы әлемдегі ұжымдық қауіпсіздік. Ортақ мақсат – ортақ жауапкершілік" ұранымен өтеді, деді Ресей президенті Владимир Путин.

Ол Бішкекте өткен ҰҚШҰ Ұжымдық қауіпсіздік кеңесінің кеңейтілген отырысында сөз сөйледі.

Оның айтуынша, Ұжымдық қауіпсіздік туралы шарт ұйымы қорғаныс өнеркәсібі кәсіпорындары арасындағы ынтымақтастықты нығайтуға ерекше назар аударады.

"Қорғаныс өнеркәсібі кәсіпорындары арасындағы ынтымақтастықты тереңдетуге ерекше назар аударғымыз келеді", - деді Путин.

Ол өз сөзінде ҰҚШҰ ұжымдық күштерін заманауи ресейлік қару-жарақпен қайта жарақтандыру бойынша ауқымды бағдарламаны іске қосуды ұсынды.

"Ұжымдық күштерді нақты әскери операцияларда тиімділігін дәлелдеген заманауи ресейлік қару-жарақпен және техникамен жарақтандыру бойынша ауқымды бағдарламаны іске қосуды ұсынамыз", - деді ол.

Оның айтуынша, Ресей ҰҚШҰ серіктестерімен бірлесіп террористік топтарды анықтау және олардың қаржыландыру арналарын жою бойынша жұмысты жалғастырады.

"Біз ұйымдағы серіктестерімізбен халықаралық террористік топтарды анықтау және жою, сондай-ақ олардың қаржыландыру арналарын бұзу бойынша жұмысты жалғастырамыз", - деді Путин.

Ресей президенті сондай-ақ келесі жылы ҰҚШҰ саммиті қарсаңында Еуразияда тең және бөлінбейтін қауіпсіздік архитектурасын қалыптастыруға арналған халықаралық сарапшылар форумын өткізуді ұсынды.

"Ресей тарапы 2026 жылы Мәскеуде ҰҚШҰ саммиті қарсаңында Еуразияда тең және бөлінбейтін қауіпсіздік архитектурасын қалыптастыруға арналған халықаралық сарапшылар форумын өткізуді ұсынады", - деді ол.

Сонымен қатар, бұл іс-шараға ҰҚШҰ-ға мүше мемлекеттердің делегациялары ғана емес, сонымен қатар ұйыммен достық қарым-қатынастағы елдердің, көпжақты құрылымдардың және интеграциялық бірлестіктердің өкілдері де қатыса алады, деді Ресей басшысы.