Қар аралас жаңбыр және +35 градусқа дейінгі аптап ыстық: жаздың соңғы күндері Қазақстанды таңғалдырады

"Қазгидромет" синоптиктері 25, 26 және 27 тамызға арналған ауа райы болжамын ұсынды, деп хабарлайды Tengrinews.kz тілшісі.

Болжамға сәйкес, тамыздың соңғы күндері Қазақстанда ауа райы құбылмалы болады. Солтүстік және шығыс аймақтарда жаңбыр жауып, найзағай ойнайды, ал кей жерлерде қатты жауын-шашын, бұршақ және екпінді жел күтіледі. Сонымен қатар, елдің басым бөлігінде +35 градусқа дейін жылы ауа райы сақталады.

Жаңбыр мен найзағай қай жерлерде күтіледі?

25-27 тамызда Қазақстанның солтүстік және шығыс аймақтарындағы ауа райына циклон мен онымен байланысты атмосфералық фронттар әсер етіп, жаңбыр жауып, найзағай ойнайды. Кей аудандарда нөсер жаңбыр, бұршақ жауып, екпінді жел соғуы мүмкін.

"Елдің шығысы мен оңтүстік-шығысындағы таулы аймақтарда 26-27 тамызда түнгі уақытта жаңбырдың соңы жабысқақ қарға ұласуы ықтимал", - делінген хабарламада.

Бұл ретте Қазақстанның батысы мен оңтүстігі жоғары атмосфералық қысымның ықпалында болады. Мұнда негізінен жауын-шашынсыз, құрғақ ауа райы күтіледі.

+35 градусқа дейінгі аптап

Жауын-шашынға қарамастан, Қазақстан аумағының басым бөлігінде жоғары ауа температурасы сақталады.

Жаздың соңғы күндерінде мынадай ауа райы болжанады:

солтүстікте +25...+32 градус; орталық және оңтүстік аймақтарда +25...+35 градус; шығыста +16...+24-тен +20...+31 градусқа дейін көтеріледі деп күтіледі. 2026 жылдың қыркүйегі Қазақстанда қандай болады?

Бұған дейін синоптиктер Қазақстандағы 2026 жылғы қыркүйек айына арналған консультативтік ауа райы болжамын ұсынған болатын. Жалпы алғанда, күздің алғашқы айы климаттық норма шамасында болады деп күтілуде, алайда кейбір өңірлерде әдеттегіден жылырақ немесе жауын-шашынды болады. Сондай-ақ бірқатар облыстарда үсік жүруі мүмкін. Толығырақ осы жерден оқыңыз.

Google News арқылы жаңалықтарымызды қадағалаңыз

Жазылу