Қарағандылық слесарь әріптестерін әнімен жадыратып жүр

Қарағандылық слесарь әуезді әнімен әріптестеріне көтеріңкі көңіл-күй сыйлап жүр. Газ желісінің қауіпсіздігін қадағалайтын өнерлі жігіт Диас Бөген ұжымды осылайша рухтандырады. Ерекше дауыс иесі көптеген әнді домбырамен нақышына келтіріп шырқайды. Музыкалық білімі болмаса да, өнерін өз еркімен шыңдап жүр. Осы уақытқа дейін бірнеше мәрте республикалық, облыстық ән байқауларының жеңімпазы атанды.

Жұмыс арасында әріптестері Диасқа жиі қолқа салады. Көпшілік өтініп тұрған соң ол домбырасын қолға алып ән де шырқайды, күй де шертіп береді. Өнерлі жігіт ұжымға үнемі көтеріңкі көңіл-күй сыйлап, айналасын думанға бөлеп жүреді. 

Ермахан Хазиров, әріптесі:

-Диас бізде жас маман. Өзінің жұмысына өте ұста, берілген тапсырманы тиянақты орындайды. Мейрамдарда, туған күндерде осы жігіт біздің көңілімізді көтереді, әні де тамаша. Өзіміз де қызығамыз сол сияқты жас болсақ екен, әнші болсақ екен деп. Енді өте өнерлі жігіт.

Диас Бөген 4-дәрежелі слесерь. Газ жүйесінің қалыпты жұмыс істеуін қадағалайды. Көгілдір отынның тұрғын үйлер мен әлеуметтік нысандарға үздіксіз келіп тұруына жауапты. Ақау шықса тәуліктің кез-келген уақытында жұмысқа барады.

Диас Бөген, слесарь:

- Келгенде иіс сезіледі. Сол кезде ашып қараймыз. Қай жерде ақау болады соны анықтап, қалпына келтіреміз. Газ монометрларын тексердім, газдың қысымын, счетчикті қарадым. Барлығы жақсы жағдайда болса, журналды толтырып тапсырып кете береміз.

Қарағандыда мұндай 62 газ бөлу пункті бар. Олар Диас сынды білікті мамандардың арқасында қалыпты жұмыс істеп тұр. Қарағанды экономика университетінің түлегі бір жыл мемлекеттік қызметте жұмыс істеген. Кейін өз қалауымен техникалық колледжге түсіп, нәсібін жұмысшы мамандықтан тапқан. «Кез келген жұмысты көтеріңкі көңіл-күймен, көппен бірлесіп істесең жеңіл, әрі қызықты болады», - дейді ол. Қолы қалт етсе домбырасын алып, жаңа әндерді үйренуге тырысады. Әншілік оған анасынан дарыған.

Диас Бөген, слесарь:

- Өзімнің отбасым музыкалық отбасы деп айтуға болады. Анам Алматыда консерваторияны бітірген. Домбыра тартқанда, ән айтқанда, жалпы домбыраны білесіз ғой ұлттық аспап болғаннан кейін қазақтың ішкі жандүниесі, рухын білдіреді. Мен өзі ауылдың баласы болғандықтан сезінгенде көз алдыма табиғат, жылқылар елейтейді.

Диас - ерекше дауыс иесі. Музыкалық білімі болмаса да, өнерге деген құштарлығы оны үнемі жаңа ізденіске жетелейді. Республикалық, облыстық ән байқауларының бірнеше мәрте жеңімпазы. Әнші слесарь алдағы уақытта ұжымның қолдауымен жеке шығармашылық концертін өткізуді жоспарлап отыр. 

Авторлары: Руслан Нұрланұлы, Аман Хамит