Қазақстандық трио Канада сахнасын сырлы әуенмен тербеді

Қазақ музыканттары Канада сахнасын сырлы әуенмен тербеді.

Роза Бағланова атындағы «Қазақконцерт» ұйымының FORTE TRIO мемлекеттік триосы Оттава қаласында өнер көрсетті.

Канададағы елшілігіміздің мұрындық болуымен музыканттар әйгілі Карлтон Доминион орталығының сахнасына шықты. Халық әні “Япурайдан” бастап “Көроғлы” күйін өзгеше орындады. Сергей Рахманинов, Антон Аренский мен Астор Пьяццолланың туындыларымен, тыңдарманның жоғары бағасына ие болды. Ансамбль құрамында белгілі пианист, Қазақстанның еңбек сіңірген қайраткері, ұжымның негізін қалаушы Тимур Урманчеев, скрипкашы Мақсат Жүсіпов және виолончелист Мұрат Нарбеков болды. Концертке Канаданың  үкімет өкілдері, Димаш Құдайбергеновтың жанкүйерлері, дипломатиялық корпус мүшелері мен қазақ диаспорасы қатысты. 

Жанара Шин, тыңдарман:

- Бүгінгі концерттен ерекше әсер алдық. Қазақстан Республикасының Мемлекеттік триосы сыйлаған музыкалық кеш жоғары деңгейімен, мазмұнды бағдарламасымен есте қалды. Кеш барысында Рахманинов пен Аренский сынды орыс классиктерінің белгілі туындылары қазақтың халық әндерімен әсем үйлесіп, қыстың аязды кешінде ерекше жылу сыйлады.

Биляна Аничич, тыңдарман:

- Қазақ күйлерінен бастап, Вивальди, Рахманинов шығармаларын ұйып отырып тыңдадым. Ұжым тамаша өнер көрсетті. Нағыз әлемдік деңгей. Өз басым Димаштың жанкүйерімін. Форте трионың ізімен Димаш та Канадада өнер көрсетсе екен деген тілегім бар.