QirSabyn анонимді Telegram арнасының әкімшілеріне үкім шықты

Астанада бір кездері танымал болған QirSabyn анонимді Telegram-арнасының әкімшілеріне үкім шықты. Сотталушылар топ болып аса ірі мөлшерде бопсалау жасағаны үшін кінәлі деп танылды, деп хабарлайды Tengrinews.kz тілшісі.

Астанада бір кездері танымал болған QirSabyn анонимді Telegram-арнасының әкімшілеріне үкім шықты. Сотталушылар топ болып аса ірі мөлшерде бопсалау жасағаны үшін кінәлі деп танылды, деп хабарлайды Tengrinews.kz тілшісі.

Р.Ә. және Р.Т. есімді азаматтарға қатысты қылмыстық іс Қылмыстық кодекстің 194-бабы 3-бөлігінің 2-тармағы "Алдын ала сөз байласу арқылы адамдар тобы жасаған аса ірі мөлшердегі бопсалау" бойынша қаралды.

Сот жабық режимде өтті, яғни оған БАҚ өкілдері мен тыңдаушылар қатыстырылмады.

Бап санкциясында мүлкін тәркілеп, 5 жылдан 10 жылға дейін бас бостандығынан айыру жазасы қарастырылған.

"Сот үкімімен Р.Ә. кінәлі деп танылып, оған мүлкі тәркілене отырып, 6 жыл 6 ай бас бостандығынан айыру жазасы тағайындалды. Р.Т. да аталған бап бойынша кінәлі деп танылып, мүлкі тәркіленіп, 6 жыл бас бостандығынан айырылды", – деп хабарлады сот.

Астана соты баспасөз қызметінің мәліметінше, үкім әлі заңды күшіне енген жоқ.

Сот ақпаратына сәйкес, қылмыстық іс апелляциялық инстанцияға түскен. Сондай-ақ сотталушылардың үкімге шағым түсіргені нақтыланды, бірақ сот процесі басталатын күн әзірге белгіленген жоқ.

Еске сала кетейік, 2024 жылғы желтоқсанда QirSabyn анонимді Telegram-арнасы әкімшілерінің қамауға алынған белгілі болған еді. Прокурорлардың ақпаратынша, олар бопсалаумен айналысқан. Тергеушілер техниканы, ірі көлемдегі ақша мен басқа да заттай айғақтарды тәркіледі.

Кейін QirSabyn анонимді Telegram-арнасының ісін ҰҚК тергеп жатқаны белгілі болды.

QirSabyn – Қазақстандағы саясаткерлер, блогерлер мен танымал тұлғалар туралы жеке мәліметтерді жариялап тұрған анонимді Telegram-арна. Оның аудиториясы 110 000-нан астам жазылушы болды. Қазір арна жабық.

Instagram-дағы бұл жарияланымды көру

TengriNews | Қазақстан жаңалықтары (@tengrinewskz) жарияланымы

2025 жылғы сәуірде Үкіметте өткен брифингте Мәдениет және ақпарат министрі Аида Балаева мұндай ресурстардың қызметі туралы пікір білдірді. Ол бүгінде Қазақстандағы анонимді Telegram-арналардың "өтірік, манипуляция мен арандатушылықтың ошағына" айналғанын және адамдардың көңіл-күйіне әсер ететінін мәлімдеді.

Министрлік басшысы сол кезде ведомствоның мұндай платформаларды анықтау мен бұғаттауға басымдық беретінін айтып, QirSabyn ісін мысалға келтірді.

Google News арқылы жаңалықтарымызды қадағалаңыз