Риддердегі медициналық кешен қолданысқа беріледі

Риддерде емхана мен стационардың құрылысы аяқталып қалды.

Бұл кеншілер қаласында кейінгі 30 жылда алғаш рет бой көтерген медицина кешені болады. Ескі ауруханада ем алып жүрген тұрғындар жаңа ғимаратты асыға күтіп жүр. Емхана бір ауысымда 500 адам қабылдаса, стационар 200 орынға арналған. Ең бастысы науқастар білікті маманға қаралу үшін облыс орталығына сабылып, кезек күтіп әуреленбейді.

Риддер тұрғындары бүгінге дейін іргетасы 88 жыл бұрын қаланған мекемеде ем алып келеді. Ескі аурухананың іші тар. Дегенмен енді бір жарым айдан соң аурухана ұжымы да, науқастар да мұндай қолайсыздықтан құтылады. Осыдан бес жыл бұрын басталған емхана мен стационар құрылысы аяқталуға жақын. Былтыр бұл жобаны іске асыру үшін қайтарылған активтерден 28 млрд-тан астам теңге бөлінген  еді.

Нұржан Мұқажанов, Риддер қ. медициналық кешені бас дәрігерінің орынбасары

-Жаңа ауруханада науқастарға қызмет көрсету үшін жаңа мүмкіндіктер ашылады. Заманауи жабдықтар қойылады. Бұрын  істей алмаған операция түрлерін де енді өзімізді жүзеге асырамыз.

Мұнда шұғыл медициналық көмек бөлімі ашылып, травмотологиялық пункт жұмыс істейді. Жаңа кешенге жалпы 12 миллиард теңгенің құрал-жабдығы қойылады. Тек мұнда енді дәрігер тапшылығы өзекті. Себебі шағын қала болғандықтан, Риддерге келген жас мамандарға көмек ретінде көтермеақы қарастырылмайды. Жергілікті әкімдік мәселені шешудің өзге де жолдарын қарастырып жатыр

Думан Рахметқалиев, Риддер қаласының әкімі

-Бізде бұл салада 59 маман жетіспейді. Дегенмен  қазір қалада тұрғын үй құрылысы қарқынды. Сондықтан мұғалімдермен қатар аурухана қызметкерлерін де баспанамен қамту ойымызда бар.

Металлургиялық кешен қызметкерлері үшін арнайы салынып жатқан көпқабатты үйден қала қажеттілігі үшін 15 пәтер бөлінеді. «Сонымен қатар «Бір қабатты шығыс» бағдарламасымен салынған үйлер де баспана мәселесін шешуге сеп болмақ, - дейді мамандар.

Эльмира Ахметова, Дмитрий Пыхтин