Салық кодексі қабылданғаннан кейін 300 мыңға жуық бизнес жабылуы мүмкін

АСТАНА, 14 қазан – Sputnik. Ұлттық экономика бірінші вице-министрі Азамат Амрин жаңа Салық кодексі күшіне енгеннен кейін қандай бизнес жабылатынын айтты, деп хабарлайды Sputnik Қазақстан тілшісі.

Келесі жылдан бастап жаңа Салық кодексі қолданысқа енгізіледі. Соның аясында қосарланған құн салығы көтеріледі.

"Иә, бизнес жабылады. Біз оны бірден айтқан болатынбыз. Бірақ кімдер жабылады? Бұған дейін өз бизнесін бөліп жүргізгендер жабылады. Себебі бұдан былай бизнесті бөліп жүргізуге мүмкіндік болмайды", - деді Амрин үкіметтегі брифингте.

Оның айтуынша, бұған дейін көбісі айналым қаражаттың шекті сомасына жеткенде бизнесін бөліп, басқа адамдардың атына рәсімдеген. Осылайша, салықтан жалтару фактілері көп болды.

"Алдын ала есебімізге сәйкес, шамамен 300 мың субъект жабылады. Себебі бизнесті бөліп жүргізудің қажеті болмайды. Біз бұрынғыдан да тиімді жағдай жасап отырмыз", - деді вице-министр.

Айта кетері, қазіргі кезде Қазақстанда арнайы салық режимін қолданатын 1,9 млн кәсіпкер мен заңды тұлға тіркелген.