Стамбұлда өлтірілген қазақстандық кәсіпкердің ісі бойынша тапсырыс берушілер анықталды

Қазақстан Ішкі істер министрлігі Стамбұлда қаза тапқан кәсіпкер Ариф Исмаиловтың өліміне қатысты тергеудің жаңа мәліметтерін жариялады, – деп хабарлайды Aikyn.kz сайты.

ІІМ Ұйымдасқан қылмысқа қарсы күрес департаментінің өкілі Қуандық Алпыстың айтуынша, Қазақстан, Түркия және Грузия полициясының бірлескен жұмысының нәтижесінде кісі өлтіруге қатысы бар деген күдікпен екі орындаушы ұсталған.

Тергеу барысында қылмыстың себебі анықталып, ұйымдастырушы мен тапсырыс берушінің жеке басы белгілі болған. Министрлік мәліметінше, олар трансұлттық қылмыстық топтың мүшелері және халықаралық іздеуде жүр.

ІІМ дерегінше, жиналған дәлелдер ҰҚК-мен бірлесіп осы топтың Қазақстан аумағында жасаған басқа да ауыр қылмыстарын әшкерелеуге мүмкіндік берген. Тергеу нұсқасы бойынша, қылмыстық құрылымды АҚШ-та жазасын өтеп жатқан криминалдық беделді тұлға басқарған.

Арнайы операция барысында Алматыда аталған топқа қатысы бар деген күдікпен бірнеше адам ұсталды. Олар бірнеше қарулы шабуылға қатысы бар деп күдіктелуде. Сондай-ақ Грузияда да осы қылмыстық құрылыммен байланысы бар күдіктілер қолға түсті.

Қазіргі уақытта барлық қылмыстық эпизодтар бойынша дәлелдер жиналып, кінәлілерді жауапкершілікке тарту жұмыстары жалғасып жатыр.

Ариф Исмаилов – Қазақстан мен Түркия арасында жүк тасымалымен айналысқан кәсіпкер. Ол Стамбұлға жұмыс сапарымен барып, сол жерде қастандық құрбаны болған. Артында жұбайы мен үш баласы қалды. Бұған дейін туыстары оның қарыздары болғаны туралы ақпаратты жоққа шығарып, бизнесін заңды түрде жүргізгенін мәлімдеген.