Steppe Games: мобильді ойын арқылы қазақ тілін заманауи әрі қызықты форматта үйренуге болады

Шайсұлтан Шаяхметов атындағы «Тіл-Қазына» ұлттық ғылыми-практикалық орталығы басқарма төрағасының міндетін атқарушы Мақпал Жұмабай ойынның мазмұнын таныстырды. 

Фото: Kazinform

— Бүгінде әлемде 2,1 млрд адам смартфон арқылы ойын ойнайды, олардың әрбір төртіншісі — бала. Егер біз балалармен тіл табысқыңыз келсе, дәл осы цифрлық ортада дамуымыз қажет. Steppe Games — қазақ тілін үйретуді ойын арқылы жүзеге асыратын алғашқы оқыту форматындағы жоба. Мұнда ұлттық тағамдар, ойындар, тарихи ескерткіштер мен салт-дәстүр элементтері қамтылған. Бүгінде Қазақстан қазақ тілінде ойлана алатын, мәтін құрастыра алатын және түрлі бағдарламаларды орындай алатын білім моделін әзірлеген әлемдегі алғашқы 15 елдің ішіне енді. Бұл біз үшін айтулы жетістік, — деді ол.

Мақпал Жұмабайдың айтуынша, жобаны әзірлеуге шамамен екі жылға жуық уақыт кеткен.

Фото: Kazinform

— Біздің ерекшелігіміз — ойынды тек IT мамандар емес, лингвистермен бірлесіп жасадық. Steppe Games — тек тіл үйрету құралы емес, дүниетанымды, ұлттық құндылықты танытатын жоба. Балалар ойнап отырып, қазақ тіліндегі A1–A2 деңгейіндегі сөздік қорын толықтырады, — дейді.

Балалар мен жасөспірімдерге қазақ тілін заманауи әрі қызықты форматта үйретуді мақсат ететін жоба кейіпкерлері — Арман мен Айша, ал олардың серігі — қазақы тазы. Ойын картасы Қазақстанның нақты географиялық бейнесіне негізделген. Әзірге Астана мен Алматы қалалары алынған. Алдағы уақытта басқа да аймақтар қосылмақ.

Фото: Kazinform

Ойын Астанадағы тарихи Бозоқ қаласында өтеді. Асық ату, садақ ату, ләңгі тебу, теңге ілу сияқты ұлттық ойындар ойналады. Ал Алматы кезеңінде ойыншы ұлттық мұражайлар мен мәдени нысандарды аралайды.

— Бүгінде әлемдегі ең қызу бәсеке — контент үшін бәсеке. Netflix өткен жылы 17 млрд доллар жұмсаған. Бұл бағытта біздің жастар жаңа мазмұн өндіруге қабілетті болуы керек. Сол үшін осындай жобаларды қолдаймыз. Steppe Games — жастарымыздың жаңа мүмкіндіктерін көрсететін ерекше бастама, — деді Ғылым және жоғары білім министрі Саясат Нұрбек.

Қазақстанның құрметті журналисі, Сенат депутаты Нұртөре Жүсіп те цифрлық дәуірдегі білім мен ойын мазмұны маңызды болуы керектігін айтты.

Фото: Kazinform

— Бүгінгі қазақ баласына ойлы ойын қажет. Қиялды ұштап, елін, жерін, тілін сүюге жетелейтін осындай жобалар керек. Steppe Games — сол сұранысты өтейтін бастама. Мұндай ойындар арқылы ұрпақ рухани тұрғыда дамып, мәдениетке, дәстүрге берік болады, — деді.

Қазақстанның мемлекет және қоғам қайраткері, Сенат депутаты Дархан Қыдырәлі жобаны ұлттық брендті танытудың заманауи тәсілі деп атады.

Фото: Kazinform

— Бұл — технология мен дәстүрдің үйлескен үлгісі. Қазақ тілін жасанды интеллект арқылы дамыту жөніндегі тапсырма осылай тез орындалып жатқаны қуантады, — деді.

Фото: Kazinform

Ал «Қазақ тілі» қоғамының президенті Рауан Кенжеханұлы кез келген ойын — жай ермек емес екенін атап өтті.

— Оның артында сол ұлттың рухы мен тілі тұрады. Сондықтан бұл — тіл жанашырлары үшін зор қуаныш, — деді ол.

Қазақы тазы спорт федерациясының құрылтайшысы Нұрқожа Бауыржанұлы балалар Steppe Games амбассадоры — тазы иттерін ала келіпті. Балалар асық ойнап, арнайы дайындалған торттан дәм татты.

Фото: Kazinform

Steppe Games мобильді ойынын App Store және Play Market платформаларынан жүктеуге болады.

«Тіл-Қазына» ұлттық ғылыми-практикалық орталығы бұдан бөлек тағы екі ірі жобаны таныстырды:

• QazGramma — қазақ тіліндегі мәтіндердің орфографиялық және стилистикалық қателерін түзететін интеллектуалды жүйе;

• Ұлттық Қазына AI көмекшісі — ересектерге қазақ тілін жасанды интеллект арқылы үйрететін жоба.

Сондай-ақ QR-код арқылы қазақ тіліне синхронды аударма жасап отыратын жаңа сайт таныстырылды. Мұнда жасанды интеллект негізінде символдық түрде аударма жасалады.

Камила Мүлік