Табиғат жанашырлары аққуларды нанмен тамақтандырмауға шақырды

Сарапшының айтуынша, нан - аққуларға зиян. Ол тез тойдырғанымен, құрамында қажетті дәрумендер мен микроэлементтер жоқ. Сондықтан аққуларды үнемі нанмен қоректендіру олардың денсаулығына кері әсер етуі мүмкін.

- Мұндай әрекет, әсіресе балапандар үшін қауіпті. Нанды ұзақ уақыт тұтыну сүйек пен қанаттың дамуының бұзылуына, сондай-ақ ағзаның әлсіреуіне әкелуі ықтимал. Бұдан бөлек, желінбей қалған нан қалдықтары суға түсіп, шіріп, бактериялардың көбеюіне және су айдындарының жағдайының нашарлауына себеп болады, - дейді ол.

Мамандар құстарды тамақтандырғысы келген жағдайда, лайықты өнімдерді таңдап, оны сирек әрі аз мөлшерде беру керектігін айтады. Ол үшін туралған қырыққабат, жапырақты көкөністер, үгітілген сәбіз немесе құстарға арналған арнайы жем қолдануға болады.

- Ең дұрыс шешім - аққулардың табиғи мекен ететін ортасын сақтау. Табиғи жағдайда олар өз қорегін өздері - су өсімдіктері мен ұсақ жәндіктерді тауып жейді, бұл олардың толыққанды әрі қауіпсіз қоректенуін қамтамасыз етеді, - дейді Данияр Әкімжанов.

Айта кетейік, биыл өңірде 25 мыңдай аққу қыстап жатыр. Олардың шамамен 3,5 мыңы Қаракөл көлінде. 

Бұған дейін, Маңғыстауда жағалаудан өлген аққулар табылған болатын. Кейін, Маңғыстаулық экологтер аққулардың өліміне қатысты зерттеу нәтижесін жариялады.