Түркістанда жас мемлекеттік қызметшілердің форумы өтті

Түркістанда «Адал азамат - әділетті қоғам кепілі» атты жас мемлекеттік қызметшілердің форумы өтті.

Жиынға өңірдегі құқық қорғау, мемлекеттік органдардың қызметкерлері мен жас мемлекеттік қызметшілер қатысып, кәсіби тәжірибе алуға мүмкіндік алды. Форумды Мемлекеттік қызмет істері агенттігінің Түркістан облысы бойынша департаменті ұйымдастырды.

Үш мыңға жуық жас мемлекеттік қызметшінің басын қосқан форумға облыс әкімі Нұралхан Көшеров, Астана мемлекеттік қызмет хабы Басқару комитетінің төрағасы Әлихан Бәйменов, мемлекет және қоғам қайраткері Оразкүл Асанғазықызы қатысып, жас буынға бағыт-бағдар берді.

Әлихан Бәйменов, Астана мемлекеттік қызмет хабы басқару комитетінің төрағасы:

- Әр адам өз перзентінің адал, ал өз үйінің әділет ордасы болғанын қалайды. Сол себепті баланың тұсауын кескенде қазақ "ала жіпті аттамайтын адал бол, қара қылды қақ жаратын әділ бол" деп бата береді. Ал адал азамат - әділетті мемлекеттің тірегі. 

«Адал азамат» жаңа дәуірдің мемлекеттік қызметшісі қандай болуы тиіс? Оларға артылар міндет пен жауапкершілік қандай? Мемлекеттік қызмет саласындағы заманауи талаптар мен адалдық қағидаттарын жастар қалай түсінеді? Форум қатысушылары осы сұрақтар төңірегінде ой толғап, тәжірибелерімен бөлісті. 

Ғабит Бабиев, Кентау қаласы әкімі аппаратының бас инспекторы:

­- Өте керемет әсер алдық. Адалдық жайында айтқаны, мейрімділік жайында. Мемлекеттік қызметші өзін мемлекеттік қызметте қалай ұстауы керек, ұстаныма қандай болуы керегі жайында көп мағлұматтар алдық. 

Мемлекеттік қызметшінің басты қағидасы – халыққа қызмет ету. Халықтың игілігіне жұмыс істеп, елге қолайлы жағдай жасау. Ол үшін әділдік пен парасаттылық мемлекеттік қызметшінің басты ұстанымына айналауы тиіс.

Абылайхан Наурызбаев, облыстық мемлекеттік қызмет істері департаментінің басшысы:

- Форумның негізгі мақсаты - мемлекеттік қызметшілер арасында әділдік, ашықтық қағидатын насихаттау. "Заң мен тәртіп" қағидатын іске асыру. Жалпы мемлекеттік қызметте таланатты жастардың буынын қалыптастыру - ол мемлекеттік қызмет істері агенттігінің басты мақсаттарының бірі.  

Жиында жас мемлекеттік қызметшілердің жеке жауапкершілігін арттыру мен сыбайлас жемқорлыққа қарсы мәдениетін қалыптастыруға баса мән берілді. 

Жандос Жұмабек, Ерболат Әбіш, Қуаныш Абуов