Тыйым салынған зат денесінен табылмауы керек еді... : халықаралық ұйым Жәнібек Әлімханұлына қатысты ұстанымын жеткізді

Дүниежүзілік бокс ұйымы (WBO) осы тұжырым бойынша орта салмақтағы әлем чемпионы Жәнібек Әлімханұлының допинг тесттен өтпей қалуына қатысты ресми мәлімдеме жасады, – деп хабарлайды Aikyn.kz сайты Sn.kz ақпарат порталына сілтеме жасап.

Мәлімдемеде WBO допингке қарсы ерікті қауымдастық (VADA) тарапынан талдау қорытындысы туралы ресми хабарлама алғанын растаған.

«Ұйым ережелеріне сәйкес және адалдыққа, спортшылардың қауіпсіздігіне және әділ бәсекелестікке деген міндеттемемізді қайта растай отырып, WBO ішкі тергеу процесін бастайды. Спортшыларға және оның өкілдеріне толық құқықтар, тиісті рәсімдер және барлық тиісті ақпаратты, түсініктемелерді және құжаттаманы ұсыну мүмкіндігі берілетін «Себепті көрсету туралы хабарлама» жіберіледі», - делінген ресми мәлімдемеде.

WBO барлық қатысушыға допингке қарсы іс-шаралар қатаң талаптар негізінде жүргізілетінін еске салған.

WBO-ның кез-келген спортшының сынамасында тыйым салынған зат табылған жағдайда  осындай талапқа сәйкес әрекет ететіні әрі ұйымның тыйым салынған заттардың немқұрайлылық немесе әдейі мақсатты пайдалануды дәлелдеуге міндетті емес екенін ескерткен.

«Тыйым салынған заттың оның денесіне енбеуін қамтамасыз ету спортшының міндеті болып саналады және спортшы анықталған кез келген тыйым салынған зат үшін толық жауапты болады, - деп атап өтті ұйым.

WBO бұл мәселе қазір белсенді тергеу үстінде болғандықтан және процестің тұтастығын сақтау үшін қазіргі уақытта ешқандай түсініктеме бермейтінін, барлық тарап WBO ережелеріне сәйкес кез келген шешімдер немесе әрекеттер туралы жазбаша түрде хабардар етілетінін мәлімдеді.

Осыған дейін хабарлағанымыздай бокс саласының бас инсайдері, журналист Дэн Рафаэль Жәнібек Әлімханұлының VADA сынамасы оң нәтиже көрсеткенін хабарлаған еді.

«Маған Жәнібек Әлімханұлының VADA тестінің көшірмесін алуға мүмкіндік туды. Орта салмақтың біріккен чемпионының қанынаны мельдоний табылған. Осыған байланысты оның Лараға қарсы сенбіге жоспарланған жекпе-жегі өтпейді. PBC қазір Лараға жаңа қарсылас іздеуде. Бұл тест жайлы бірінші болып The Ring хабарлаған», – деп жазды Дэн Рафаэль әлеуметтік желідегі парақшасында.

Жәнібек Әлімханұлы әлеуметтік желідегі парақшасында допинг дауына қатысты өз пікірін айтты.

«Мен әрқашан таза спортты қолдаймын. Мұны жақсы білесіздер. Мен таза спортты насихаттап жүргенімді де білесіздер. Жаңалықты оқып таңғалып отырмын. VADA бірінші рет анализ алып, бәрі таза деп еді. Мен витаминдеріме де, тамағыма да ешқандай өзгеріс енгізбедім. Екінші рет тестте неге мұндай болғанын түсінбей отырмын, біз қайта анализ тапсыруға өтініш айттық. Жауабын күтіп отырмыз! - деді боксшы instagram парақшасында.

Жәнібек Әлімханұлы және Эрисланди Лара арасындағы орта салмақтағы WBO, IBF және WBA белбеулері үшін біріккен титулдық жекпе-жек осы жекскебі АҚШ-тың Техас штатында өтеді деп жоспарланған болатын.