Ұлытауда жастар саясатын үйлестіру мәселесі өзекті болып тұр

Ұлытау дербес облыс болғалы үш жыл өтсе де, жастар саясатын үйлестіретін басқарма немесе ресурстық орталық әлі құрылмаған.

Жастар бас қосып, ауқымды шаралар өткізетін арнайы орын да тапшы. Ескі жастар сарайы тарлық етеді әрі заманға сай жабдықталмаған. Өңір жастары осы мәселені Парламент Мәжілісі депутаттарымен кездесуде көтерді. Депутаттар Аманжол Әлтай мен Ерболат Сатыбалды жиналғандардың сауалына жауап беріп, жастарды қолдау шараларының қажеттігін айтты. Әйтпесе өңірде жас мамандарды тұрақтандыру қиын болады. Еркін форматта өткен жүздесуде жастар лудомания және алаяқтық қылмыстардың алдын алу бойынша ой бөлісті.

Ерболат Сатыбалды, ҚР Парламенті Мәжілісінің депутаты:

- Жастардың осында тұрақтап қалуы үшін жоғары оқу орны керек. Одан кейін жастарға бірталай жағдай жасалу керек. Театр салыну керек, концерттік зал керек дегендей мәселелердің біразын жастар көтерді. Біз енді бұл сұрақтарды Үкіметтің деңгейінде көтереміз, кездесуіміздің соңында өңір басшысымен де осы мәселелерді талқылайтын боламыз. Жалпы маған ұнағаны жастардың ашықтығы, өңірдің дамуына деген өздерінің қатысқылары келетіні туралы құлшыныстары қуантты.