Жантүршігерлік оқиға: Алматыда ер адамды өлтіруге қатысты төрт күдікті ұсталды

Алматыда қаланың 61 жастағы тұрғынын өлтіру дерегі бойынша тергеу жалғасып жатыр.

Полиция департаментінің мәліметінше, қылмыстық іс бойынша төрт адам ұсталған.

Бұған дейін әлеуметтік желілерде екі ер адамның подъезге кіріп бара жатқан сәті түсірілген видео тараған. Кейін олардың бірі басына пакет кигізілген адамды иығына салып, сыртқа алып шыққан. Бейнежазба жарияланғаннан кейін полиция тергеу басталғанын хабарлады. Алғашында үш күдіктінің ұсталғаны белгілі болған.

Кейін Алматы қаласының Полиция департаменті ұсталғандар саны төрт адамға дейін өскенін нақтылады.

Тергеу барысында қылмыстың мән-жайы мен күдіктілердің жеке басы анықталды. Сондай-ақ олардың марқұмның пәтерін заңсыз иемденуге қатысы бар-жоғы тексеріліп жатыр. Төртеуі де уақытша ұстау изоляторына қамалды.

Істі тергеу үшін Ішкі істер министрлігінің тәжірибелі қызметкерлерінен арнайы тергеу-жедел тобы құрылды. Қылмыстық іс Ішкі істер министрінің ерекше бақылауында.

Бүгін, 11:07